Su Alteza Real Prinses Beatrix di Hulanda lo bishitá Sint Eustatius i Boneiru for di djamars 18 di november te djabièrnè 21 di november. E bishita ta enfoká riba e trabou di Dutch Caribbean Nature Alliance (DCNA) i riba iniciativanan sosial ku ta tuma lugá na e isla-nan. Prinses Beatrix ta Patrona di DCNA.
Na mainta, Prinses Beatrix lo bishitá e Reforestatia nursery, ku ta parti di e proyekto di reforestashon di St. Eustatius National Parks Foundation (STENAPA). Den e kas di glas ta kosechá mata i palu nashonal chikí. E proyekto ta kontribuí na e biodiversidat di e isla, ta reducí eroshon, i ta limitá e fluhonan di sediment den laman. Prinses lo risibí un tour den e kas di glas i un presentashon di Junior Rangers riba e diferente spésies di mata, sigui pa un kaminda kortiku den e hòfi.
Despues, Prinses lo risibí informashon riba e protekshon di e iguana antiano, un spési nashonal ku ta den peliger grandi di desaparesé for di e isla. E iguana aki ta eksistí solamente na e islanan Windward. Dor di programa di kriamentu, ta trahando pa protehá e populashon di Sint Eustatius. Na presensia di Prinses, un miembro di e ekipo di STENAPA lo liberá un iguana antiano serka di e nursery.
Sigui ku esaki, Prinses lo bishitá e Biblioteka Públiko, kaminda lo duna su informashon riba e Child Friendly Cities Initiative (CFCI), un programa di UNICEF ku ta yuda komunanan pa desaroyá un ambiente sigur i stimulatorio pa mucha. Un grupo di hubentud lo presentá e punto prinsipalnan di e programa via nan mes foto, pintura i dibuho. E témnan lo inkluí evaluashon di derecho di mucha, participashon di hubentud i salú mental.
Na atardi, Prinses Beatrix lo bishitá e Government Guest House den e centro históriko di Oranjestad, kaminda STENAPA lo splika e importansia di kolaborashon den manejamentu ambiental i e konekshon entre kultura i natura. Prinses lo reuni ku diferente representanten pa diskuti e témnan aki. Huntu ku STENAPA i miembro di komunidat, Prinses lo planta un palu komo simbólo di e lazo entre STENAPA i e pueblo di Sint Eustatius.
Despues, Prinses lo habri e Kings Well National Park Centre, e instalashon nobo di STENAPA. E sentro nobo ta sirbi komo sede moderno pa manejamentu ambiental, investigashon i edukashon. Despues di e programa formal, Prinses lo risibí un tour i informashon den e laboratorio, i lo topa ku algun Junior Rangers pa papia riba e importansia di konservashon di naturalesa.
E Dutch Caribbean Nature Alliance (DCNA) ta un organisashon sin fin di lucro ku a wordu establecé pa protehá e medio natural den e Karibe Hulandes. E alianza ta kompuestó di e siguiente fundashonnan: Aruba Conservation Foundation (ACF), Caribbean Research and Management of Biodiversity (Carmabi), Nature Foundation Sint Maarten (NFSXM), Saba Conservation Foundation (SCF), St. Eustatius National Parks Foundation (STENAPA), i Bonaire National Parks Foundation (STINAPA Bonaire).
E organisashonnan di naturalesa di e seis isla-nan di e Karibe Hulandes ta traha huntu pa mehorá e manejamentu ambiental, asegurá fondo sostenibel, promové edukashon ambiental, i fasilitá e intercambio di konosementu.
Press release: Entidat Públiko Sint Eustatius