Den e simannan tras di lomba diferente desaroyo a tuma lugá relashoná ku e operashonnan militar merikano den área karibense. Marina merikano a ataká vários boto ku presuntamente tabata transportá droga. Tambe Merka a anunsiá di lo stashoná barku i material adishonal den region. Komprendibelmente e desaroyonan akí a kondusí na preokupashon persistente serka habitantenan di Boneiru.
Gezaghèber di Boneiru, sr John Soliano, ta rekonosé e preokupashon akí i e ke informá Boneiru su habitantenan ku kontinuamente e tin kontakto ku Ministerio di Asuntunan di Eksterior i Ministerio di Defensa tokante kualke desaroyo ku ta di importansia pa Boneiru.
Den lus di e tenshonnan geopolítiko ku ta oumentando entre Merka i Venezuela, minusiosamente gezaghèber huntu ku gobièrnu di Reino ta keda vigilá e desaroyo akí i e eventual konsekuensianan di esaki pa Boneiru. Protekshon di interes di tur habitante tin prioridat kontinuo di gezaghèber. Asina ku tin informashon nobo, lo duna mas aktualisashon.
Press release: Gobièrnu di Boneiru