E siman aki Filomena College MAVO na San Nicolas, como e prome scol di Aruba cu e proyecto aki, tin bishita di 9 studiante Italiano. E grupo aki ta procedente di e scol secundario ISIS CHARLES DARWIN cu ta Istituto Statale di Istruzione Superiore di Roma. Nan ta acompaña pa dos maestro cu ta Antonio Sciortino y Eleonora Minelli.
E proyecto cu ta sostene e programa aki ta Erasmus+ for di Hulanda den cual intercambio y educacion di sistemanan escolar ta central. Cada scol ta siña for di otro con cada un ta ehecuta nan forma di educacion.
E grupo di hoben aki tin un programa extenso cu bou guia di maestronan Daisy Franken, Raquel Lampe, Joraine Oduber y Mariela Carrion nan tin cu sigui pa na final nan duna un presentacion. Un di e temanan importante ta e conservacion di Aruba su naturalesa enfocando tanto riba Aruba su Mangrovenan y Aruba su coralnan den lama. Pa esaki e grupo a bishita Parke Arikok hunto cu Rambo Flanegien, Spaans Lagoen, Museo Archeologico Arubano y e terenonan di Aruba Aloë na Hato. Tambe nan tin cu sigui algun les na scol.
Directorado di Filomena College MAVO ta yama e grupo Bon Bini y ta gradici Erasmus+ y Skoa pa e oportunidad aki. Den februari un grupo di 15 alumno di Filomena College lo ta bishitando Roma.
