Gobierno di Aruba a convoca un reunion di urgencia cu diferente instancianan cu ta traha rond di turismo, despues di un cantidad considerabel di cancelacion di vuelonan procedente di Merca. E reunion a tuma luga na oficina di Crisis Management Office (CMO), unda a wordo discuti e impacto di e situacion riba Aeropuerto Internacional Reina Beatrix.
Segun informacion oficial, 423 pasahero a keda afecta y mester a wordo acomoda temporalmente na Aruba. E cancelacionnan tabata mayormente consecuencia di mal tempo na Merca, particularmente e fuerte tempestad di sneew, pero tambe door di fayonan technico di avionnan , segun prome minister Mike Eman .
Prome Minister Mike Eman a hiba palabra despues di e reunion, indicand cu gobierno a actua di forma coordinado pa garantisa cu tur turista ricibi e atencion cu nan merece.
Gobierno y sector di turismo ta traha pa acomoda turistanan cu a keda Aruba.Segun Prome Minister Eman, e fin di siman tabata un periodo excepcional pa Aruba, considerando e gran fluho di turista cu tabata yegando na isla. Sinembargo, debido na e situacion inespera, diferente departamentonan a uni for di inmediato pa busca solucion pa turistanan cu no por a regresa nan cas.Gobierno a enfatisa cu, a pesar di e circunstancianan, e obhetivo principal ta pa cu tur turista laga Aruba cu un recuerdo positivo di hospitalidad y servicio.
Cancelacionnan no ta solamente relaciona cu sneew.Autoridatnan a aclara cu no tur cancelacion di vuelonan a wordo causa directamente pa e tempestad di sneew na New York y New Jersey. Un parti di e cancelacionnan tabata resultado di fayonan tecnico di avion, loke a contribui cu un cantidad adicional di pasahero a keda Aruba. Segun gobierno, e situacion meteorologico na Merca ta mustra mehoramento, pero si e mal tempo persisti, no ta exclui cu mas cancelacion por tuma luga.
Minister di Turismo: situacion a wordo trata como crisis
Minister di Turismo Wendrick Cecilia a confirma cu Aruba ta enfrenta un combinacion di cancelacion di vuelonan pa motibonan tecnico y climatologico.
Segun e ministro, e cantidad di cancelacionnan ta permiti pa cataloga e evento como un crisis, loke a haci necesario pa tur instancianan relevante traha hunto pa atencion di e turistanan afecta.
ATA: Hospitalidad ta un responsabilidad colectivo
CEO di Aruba Tourism Authority (ATA), Ronella Croes, a subraya cu turismo ta un responsabilidad colectivo.
Segun Croes, aunke cancelacion di vuelonan no ta un situacion nobo pa Aruba, e situacion actual ta un oportunidad pa mustra con cada entidad por contribui pa un manejo efectivo y humano di un crisis. Personanan cu tin acomodacion y cu kier yuda por tuma contacto via 733-4717 of 593-6662.
