Na juli 2025, Cuerpo Policial Aruba (KPA) a lansa oficialmente un proyecto piloto pa introduccion di “bodycams”camaranan cu polisnan ta bisti riba nan curpa durante servicio. E iniciativa tabata destina pa aumenta transparencia, responsabilidad y profesionalismo dentro di KPA, asina tambe pa fortalece confiansa di e publico, siguridad riba e isla y pa tin documentacion obhetivo di incidente nan durante asistencia policial.
Pa e proyecto piloto, a cumpra un total di 28 bodycams via Setar. Polisnan cu uniform den districtonan manera Oranjestad y San Nicolas tabata participa den e fase inicial, cu e proyecto piloto plania pa dura entre tres te seis luna. Despues di e periodo aki, tabata prevista un evaluacion pa determina si e sistema lo wordo implementa na escala nacional pa tur polisnan cu ta sali na asistencia.
E grabacionnan di bodycam tabata destina pa wordo uza den investigacion criminal, proceso hudicial, coleccion di evidencia y pa monitoria di conducta di polis durante contacto cu comunidad.
Rapportnan te final di augustus 2025 a indica cu e proyecto piloto tabata progresa. Sinembargo, te dia di awe no tin claridad publico riba resultado di e evaluacion ni riba si a wordo tuma un decision final pa implementacion completo di bodycams dentro di KPA.
E pregunta cu ta surgi awor, specialmente na luz di incidentenan serio reciente cu a involucra intervencion policial, ta si polisnan tabata efectivamente ekipa cu bodycams durante e ultimo caso di tiramento. Den caso afirmativo, e grabacionnan lo por representa evidencia clave pa un investigacion independiente y pa trece claridad e hecho mas aya di testimonio contradictorio. Den caso negativo, e cuestion ta unda e bodycams cumpra pa e proyecto piloto ta encontra y dicon e implementacion no a sigui despues di juli 2025.
Miembro di comunidad ta sigui puntra riba e estado actual di e proyecto piloto, e motibo pa su posibel stancamento y e rol cu e tecnologia aki por hunga den reforsa transparencia y confianza entre polis y pueblo.
Te e momento aki, KPA no a comunica publicamente un actualisacion oficial riba continuidad ni riba resultado final di e proyecto di bodycam, dicon ?
Tambe ta importante recorda cu den pasado, ex lider di fraccion di PPA, Otmar Oduber, a presenta un mocion den Parlamento di Aruba cu a haya sosten amplio pa introduccion di bodycams pa polis. Parlamento a aproba e iniciativa cu e meta di proteha tanto polis como ciudadano, y pa crea mayor claridad riba comportacion durante asistencia policial. Parlamento tabata uni pa esaki.
Mientras tanto, Aruba ta enfrenta otro caso lamentabel unda material audiovisual por tabata un instrumento decisivo pa resolucion y transparencia pa e caso.
E pregunta cu ta keda habri ta: ken ta responsabel pa no implementacion completo di bodycams pa proteccion di polis y ciudadanonan ? Parlamento di Aruba ta eherce su rol di supervision, of e tema ta keda sin siguimento?