Aruba no ta experenciando crecemento demografico significativo, pero e cantidad di auto riba isla ta sigui subi na un ritmo constante. Segun informacion for di Departamento di Impuesto (DIMP), ta premira cu prome cu fin di aña e cantidad total di vehiculonan registra lo yega na 100 mil.
Vocero di DIMP, Merverly Romano Kelly, a indica cu esaki ta un cifra considerabel mirando cu Aruba ta un pais chikto. E a mustra su preocupacion riba e ritmo di crecemento den e cantidad di vehiculo riba isla.
24% ainda no a paga nan plachi di number
Segun Romano Kelly, 24% di automobilistanan ainda no a cumpli cu nan obligacion di pago pa plachi di number. E categoria cu tin e cantidad mas halto di atraso ta plachi di number A.
E vocero a elabora cu e departamento ta sigui monitoreando e situacion y ta haci yamada pa automobilistanan pone nan documentacion i pagonan na ordo.
Alerta riba plachi ilegal
DIMP tambe a manda un advertencia na comunidad tocante personanan cu ta traha plachi di number similar na esunnan oficial. Segun Romano Kelly, tur persona cu ta involucra den e tipo di actividad aki ta cometiendo un acto ilegal.
E departamento a indica cu tin bista riba e practicanan ilegal aki y ta tuma medidanan contra esnan responsabel.
Registracion nobo ta subi rapidamente
Cifranan reciente ta mustra un aumento rapido den registracion di vehiculo. Na luna di Januari, DIMP a habri aña cu 97.710 vehiculo registra. Pa Februari, e cifra a subi pa 98.007.
Esaki ta mustra cu den algun siman so, mas cu 297 vehiculo nobo a wordo agrega na e registro nacional, loke ta pone Aruba mas cerca di e marca historico di 100 mil vehiculo registra.
Autoridadnan ta sigui monitoreando e desaroyo aki, mirando e impacto cu e crecemento di vehiculo por tin riba trafico, infrastructura y medio ambiente riba isla.