Unit Narcotica di Cuerpo Policial a conduci un accion diabierna atardi na Hendrikstraat na Oranjestad, dirigi riba actividadnan relaciona cu bendemento di droga. E operacion a resulta den dos detencion y confiscacion di diferente tipo di droga.
Durante e accion, polis a detene un homber local y un muher cu nacionalidad dominicano.
Den curso di e rasia, polis a topa y confisca un cantidad di droga riba e sospechosonan. Segun informacion preliminar, ta trata di cocaina y base. E droga confiscá lo wordo analiza mas aleu como parti di e investigacion.
Polis a indica cu e investigacion ainda ta andando y no ta descarta cu por tin mas detencion den e dianan cu ta bin.
Cuerpo Policial ta recorda comunidad cu si algun persona tin informacion of a mira algo sospechoso, por contacta e tipline di Polis na number 11141. Tur informacion lo wordo trata de forma confidencial y bo por keda anonimo.