Lider di fraccion di FUTURO, Ruthlyn Lindor, a expresa preocupacion riba e limitacionnan financiero cu ta existi den e Loan Agreement for Financial Transactions (LAFT), particularmente riba e manera cu Aruba por uza su surplus financiero.
Segun Lindor, e tasa di interes cu Aruba ta paga actualmente riba su debenan ta na un nivel relativamente halto di 6.9 porshento, algo cu e la considera mas halto cu otro debenan cu e pais tin. Sinembargo, el a indica cu e punto di mas preocupacion den e momento aki ta cu Aruba no tin libertad pa inverti e surplus cu e pais ta genera.
“El pais ta logra un suma di ganashi, unda un parti naturalmente ta bay pa paga debenan, pero e otro parti di e surplus mester por wordo uza pa inversion den nos comunidad,” Lindor a declara.
Necesidad pa mas clarificacion riba HOFA
Lindor a agrega cu, segun informacion preliminar, e marco di e Rijkswet HOFA lo permiti un tasa di interes mas abou compara cu e situacion actual. No obstante, el a reconoce cu ainda no tin un bista completo di tur e detaye nan cu ta inclui den e ley. P’esey, el a indica cu ministro di Finansa, Geoffrey Wever, mester presenta su mes den Parlamento pa brinda un splicacion mas amplio y preciso riba e implicacionnan di e acuerdo.
Segun calculacionnan menciona pa Lindor, e diferencia den carga financiero por representa entre 50 y 60 miyon florin pa aña. Den un periodo di aproximadamente 11 te 12 aña, e suma ey por alcanza cerca di 700 miyon florin, fondo cu, segun el, por wordo reinverti den desaroyo di pueblo.
Posibilidad pa inversion social y resiliencia financiero
Lindor a enfatisa cu, si Aruba logra mas espacio financiero, e pais por inverti den sector social, educacion y otro prioridadnan nacional. El a indica cu esaki tambe por facilita pago di salarionan y cumpli cu demanda nan cu sindicatonan regularmente ta presenta, particularmente ora cu tin un surplus disponibel.
Ademas, el a menciona cu un situacion financiero mas estable por crea oportunidad pa Aruba diversifica su economia y desaroya un otro pilar economico. Tambe lo permiti gobierno traha riba fondonan di reserva pa situacion di calamidad of emergencia.
“Aruba mester por conta riba su propio recurso nan y no semper mester bay afo pa busca mas fiansa of pidi asistencia financiero adicional,” Lindor a conclui.