Tourism Corporation Bonaire (TCB) i Fundashon Formashon Pa Mañan (FORMA) a firma un Memorandum of Understanding (MOU) pa fortifiká nan kolaborashon riba tereno di kapasitashon i desaroyo di tour guide-nan kualifiká na Boneiru. Señora Soraida T. Mensche-Statius, direktor di FORMA, i señora Elesiër Angel, direktor di TCB a firma e akuerdo.
Pa medio di e kolaborashon akí ofisialmente TCB ta rekonosé e kurso “Bonaire in Depth and Guiding Skills” ku FORMA ta organisá. Ya pa vários aña kaba nan ta ofresé e programa akí i e ta brinda e partisipantenan e konosementu i e abilidatnan ku ta nesesario pa na un manera responsabel duna rekorido na turista i duna nan informashon tokante Boneiru su historia, kultura i naturalesa.
Señora Sue Felix ta esun ku originalmente a desaroyá material di e kurso akí. Te ainda e trabou di señora Felix ta forma e konosementu básiko ku nan ta usa durante e kapasitashon pa tour guide na nos isla.
Tour guide-nan kualifiká ta hunga un ròl importante na momentu di brinda eksperensianan di kalidat haltu na nos bishitantenan. Pa medio di rekonosé e kapasitashon akí, TCB ta sostené desaroyo mas aleu di profeshonalnan eksperto ku por representá Boneiru i su patrimonio úniko.
“Nos tour guide-nan ta forma un parti esensial den e manera ku nos bishitantenan ta eksperensiá Boneiru. Nan ta karga nos kuentanan, nos historia i nos konektividat ku naturalesa huntu ku nan. Pa medio di e kolaborashon akí ku FORMA, nos ta fortifiká e base di nos sektor turístiko pa medio di invertí den hendenan ku ta representá nos isla ku konosementu, ku outentisidat i na un manera kuidadoso”, segun Elesiër Angel, direktor di TCB.
Pa medio di e kolaborashon akí, un biaha mas TCB i FORMA ta konfirmá nan kompromiso konhunto pa fortifiká Boneiru su sektor turístiko i na mes momentu sòru pa nos bishitantenan por gosa di eksperensianan signifikativo i inolvidabel na nos isla.
