Plan di Klima Boneiru, bou di presidensia di Nolly Oleana, ofisialmente a entregá e Plan di Klima Boneiru na Kolegio Ehekutivo. E plan ta resultado di un trayekto intensivo i partisipativo ku a kuminsá dia 1 di ougùstùs 2024 i ku tabatin sosten amplio di nos komunidat boneriano.
‘Nos isla, nos responsabilidat’, asina presidente Nolly Oleana a aksentuá. ‘E plan di klima akí no ta solamente un dokumentu, pero tambe un rumbo konhunto pa futuro di Boneiru. E ta laga nos mira ku nos komunidat ta dispuesto pa yuda pensa, asumí responsabilidat i traha huntu pa logra un isla habitabel pa e generashonnan di futuro.’
Durante e trayekto e grupo di proyekto a traha aktivamente huntu ku habitantenan, empresanan, organisashonnan sosial i instansianan di gobièrnu. Nan a organisá seshonnan di trabou, hiba kòmbersashon den e barionan i ku hóbennan, miéntras kunukeronan i piskadónan tambe a kompartí nan eksperensianan i preokupashonnan. Banda di esaki un enkuesta amplio bou di nos poblashon a sòru pa konosementu balioso ku nan a prosesá direktamente den e plan.
E Plan di Klima a keda realisá ku sosten di Beyonder BV i Matribu BV. Banda di esaki IPDC a formulá e kapítulo teóriko di e plan, kompletamente basá riba input i konosementu ku a keda akumulá durante e seshonnan di trabou i e momentunan di partisipashon ku komunidat boneriano. Ku esaki e plan no ta forma solamente un dokumentu di maneho, pero tambe un refleho di e eksperensianan, e preokupashonnan i e deseonan di nos komunidat mes.
E nesesidat pa sigui dal bai ku e trabou ta grandi awor akí. Esaki pasobra e konsekuensianan di kambio di klima na Boneiru no ta algu di futuro mas, pero awendia ya kaba nos ta sinti esakinan diariamente. Pensa riba temperatura ku ta subiendo, sekura i skarsedat di awa ku ta oumentando, eroshon di kosta i subida di superfisie di laman, nos refnan di koral ku ta keda afektá i ku ta blikia, pèrdida di biodiversidat i e preshon ku ta oumentando riba suministro di kuminda i siguridat di eksistensia. E desaroyonan akí tin impakto direkto riba habitabilidat, ekonomia i salú di nos isla.
Pa e motibu akí e Plan di Klima ta enfoká riba prioridatnan konkreto manera siguridat di awa, protekshon di nos ekosistemanan, desaroyo teritorial sostenibel i siguridat di kuminda. Ku esaki e plan ta konektá estrechamente ku e ambishonnan di Vishon 2050 Boneiru: un Boneiru habitabel, resiliente kontra klima i sostenibel.
Durante un konferensia di trabou den luna di yanüari di e aña akí, kaminda empleadonan públiko di Entidat Públiko Boneiru i representantenan di diferente ministerio hulandes tabata presente, a pone un promé paso konhunto pa un agènda di ehekushon. Esaki ta forma un base importante pa e siguiente fase: di plan pa ehekushon.
Ku énfasis e grupo di proyekto a trese importansia di pasonan direkto di kontinuashon bou di atenshon di Kolegio Ehekutivo. Den nos komunidat ta biba un deseo klarito pa mantené e ‘momentum’ ku a keda realisá i evitá mas retraso. E desafionan ku Boneiru ta konfrontá ta rekerí determinashon, kolaborashon i kontinuidat atministrativo – tantu lokalmente komo for di Hulanda.
Den esaki e grupo di proyekto ta ekspresá e speransa ku Entidat Públiko Boneiru i e ministerionan enbolbí ta sigui invertí konhuntamente den un aserkamentu struktural, di manera ku debidamente por konbertí e rekomendashonnan di e plan di klima den akshon visibel i solushonnan sostenibel pa nos isla.
Banda di esaki, riba término kòrtiku, lo organisá un seshon di fitbèk pa komunidat boneriano. Durante e enkuentro akí lo duna splikashon tokante kontenido di e Plan di Klima i lo informá habitantenan tokante posibel pasonan di kontinuashon i prioridatnan di ehekushon.
E grupo di proyekto ta ekspresá su gran apresio pa tur habitante, organisashon i partner ku a kontribuí na e resultado konhunto akí.
‘Sin enbolbimentu di nos komunidat, nunka nos lo no por a yega na un plan ku tur hende ta karga asina ampliamente,’ segun presidente Nolly Oleana. ‘Netamente e kompromiso kompartí akí ta duna konfiansa ku Boneiru por atendé ku e desafionan di futuro. E plan akí ta un paso importante den direkshon di un Boneiru mas fuerte, mas sostenibel i mas habitabel.’
Ku e Plan di Klima nos tin awor akí un fundeshi sólido pa hasi Boneiru resistente i resiliente pa futuro.
Nos isla, nos responsabilidat.
