Den e ultimo dianan, George Vieira, propietario di George Cycle Rental, a expresa su descontento cu e manera cu gobierno a implementa e decision pa limita e ruta di ATV y UTV nan. Vieira, cu tin 49 aña di experiencia den e industria, ta enfatisa cu e companianan di tour ta esnan cu mas interes tin den cuida e naturalesa di Aruba, pa motibo cu esey ta e atractivo principal cu nan ta presenta na e turistanan.
Impacto economico y operativo
Segun Vieira, e medida aki ta contraproducente, ya cu e companianan aki ta genera entrada pa e pais di forma directo y indirecto. E gastonan cu e companianan tin, incluyendo compra di vehiculo, gasolin, licencia y pago di impuesto, ta contribui directamente na e caha di gobierno. Ademas, e banconan cu ta financia e empresanan aki tambe ta wordo afecta, lo cual por crea un efecto di “domino” negativo pa nos economia.
Preocupacion pa e sector turistico
E empresario ta adverti cu si no bin un cambio rapido, e sector turistico por enfrenta cancelacion masivo di reservacion. Vieira ta señala cu tin turistanan caba ta cancelando nan biahe debi na e incertidumbre, loke por nifica un baha den turismo pa fin di aña. Gobierno di AVP –FUTURO ta hungando cu pan di cada dia di pueblo di Aruba
Falta di atencion di parti di Gobierno
Frente na e situacion aki, Vieira a busca contacto cu varios parlamentario pa splica e urgencia di e problema, pero e ta denuncia cu e minister encarga, René Herdé, no a contesta su e-mail ni duna e atencion necesario na e preocupacionnan aki.