E Comision di Apelacion (Bezwaaradviescommissie LAR) a notifica e interesadonan cu nan conseho relaciona cu e recurso entrega dia 30 di maart 2026 contra e decision di Minister di Relacionnan di Reino, Enseñansa, Hubentud, Innovacion y Deporte, a ser entrega na e organo administrativo encarga.
Den un comunicado di fecha 10 di juli 2026, bou di e referencia LAR/GOB-124/26, e Comision a informa Sra. E. Wever Croes y Sr. R. Tjon cu, conforme articulo 19, inciso 4, di e Ordenansa Nacional di Husticia Administrativo, e conseho a keda entrega na e autoridad gubernamental pa tuma un decision.
Un historial di falta di claridad E notificacion aki ta cay den un momento unda e maneho di e Minister den cuestion ta bou di un lupa constante pa falta di transparencia. E situacion aki no por wordo mira apart di e polemica cu a surpasa e ultimo lunanan tocante un biahe cu e Minister a haci den un jet priva. Den e caso ey, e Minister a nenga di contesta tres pregunta clave di Parlamento: cuanto a paga, na ken a paga, y ki dia a paga. Apesar di exigi claridad for di november 2025, Parlamento te ainda no a haya contestanan concreto, loke ta alimenta e desconfiansa den e maneho di e Minister.
Un proceso bou di lupa Segun ley, e organo administrativo tin un plaso di seis siman despues di e fecha di e conseho pa tuma un decision final riba e recurso actual. Di mesun banda, e Comision a aclara cu ta e Minister mes mester percura pa entrega e interesadonan un copia di e conseho emiti.
Despues di ricibi e notificacion aki, e personanan concerni a manda solicita e Minister formalmente pa entrega e copia aki. Sinembargo, dado e antecedente di e Minister di nenga informacion (manera den e caso di e jet priva, unda a purba hasta uza e Ley di Openbaarheid van Bestuur sin exito), tin un desconfiansa grandi tocante e tempo cu esaki por dura.
E temor pa demora E peticion aki ta sosode den un momento di frustracion, ya cu esaki no ta e unico tramite pendiente cu e Minister. E peticionarionan a expresa nan preocupacion cu e proceso administrativo aki por bira un espera largo y innecesario, mescos cu nan ta pasando aden cu e prueba di pago, cual te ainda no a keda entrega.
Ciudadanonan y esnan envolvi ta keda pendiente pa mira si e biaha aki e Minister lo actua cu e diligencia cu ley administrativo ta exigi, of si e lo sigui den e mesun liña di opacidad cu a marca su gestion den e caso di e jet priva, evitando asina cu e ciudadano bolbe keda atrapa den un laberinto burocratico.
