Miembronan di Aruba Timeshare Association (ATSA) a reuni recientemente den cuadro cu nan encuentro unda ta repasa e ultimo kwartaal. Esaki a pasa durante un lunch-meet na La Cabana Beach Resort & Casino, unda lidernan di e industria a tene discusionnan habri tocante desaroyonan den e sector, politica publico, iniciativanan di sostenibilidad y proyectonan di inversion den resortnan.
E reunion a brinda un oportunidad pa miembronan comparti actualisacionnan di nan respectivo propiedadnan, discuti asuntonan di interes comun y reafirma nan compromiso colectivo pa sigui fortalece e industria di vacation ownership na Aruba.
Dialogo Social, educacion y sostenibilidad
Miembronan a acorda cu e iniciativa di “Dialogo Social” cu a wordo ampliamente promociona pa Gobierno mester ta guia p’e stakeholdernan directamente envolvi. Banda di e discusionnan tocante e propuesta pa aumenta salario minimo, participantenan a enfatisa cu e agenda tambe mester acorda temanan cu ta di relevancia directo p’e industria, incluyendo posibel amienda sugeri pa loke ta legislacion laboral.
Demostrando su compromiso continuo cu educacion y desaroyo di forsa laboral, ATSA a anuncia cu lo ricibi studiantenan di hospitalidad un biaha mas pa un introduccion interactivo den e mundo di vacation ownership. E programa di mita dia, organisa profesionalmente, ta enfoca riba crea consciencia tocante e tanto oportunidadnan di carera y empresarial cu ta existi den sector di timeshare na Aruba.
ATSA tambe ta trahando hunto cu su miembronan pa desaroya un manual integral di Codigo di Etica cu lo defini metanan ambiental, establece camindanan practico pa operacionnan sostenibel y promove practicanan responsable den hospitalidad. E asociacion tin intencion di invita Universidad di Aruba pa yuda den compara strategianan exitoso y miho practicanan internacional.
Cu temporada di huracan den Caribe cual a caba di cuminsa, miembronan tambe a discuti un peticion di Bureau Calamidad di Gobierno. ATSA lo mester nombra un Lider di Crisis for di entre su resortnan miembro pa representa e asociacion den Cluster 8 di e Team Nacional di Crisis, sosteniendo coordinacion di recursonan durante emergencia. Nombracion di candidato for di resortnan miembro lo wordo presenta den e siguiente simannan.
Turismo, politica publico y experiencia di bishitante
Durante e reunion tambe a keda trata e Tourism Calibration Framework, un documento di politica publico di 90 pagina presenta recientemente pa Minister di Turismo. Miembronan a duna bon bini na e oportunidad pa contribui recomendacionnan y expresa nan deseo pa mira varios prioridadnan historico di e industria incorpora den e marco.
Entre esakinan ta actualisa e actual Politica di Playa di Aruba, mehora opcionnan di transporte pa bishitante, incluyendo introduccion di un app pa taxi, regula e sector di rent vacacional, evalua e frecuencia y rendimiento economico di yegada di crucero, y analisa e impacto cu bishitanan di crucero tin riba experiencia di playa y experiencia general di bishitantenan cu ta bini na e isla.
Miembronan a nota cu, aunke e documento ta toca temanan importante, ainda ta falta plannan concreto di implementacion y medidanan cu por ehecuta. Un di tres ronda di reunionnan cu stakeholdernan ainda ta pendiente, durante cual lo spera pa tin un dialogo mas concreto tocante e plan di accion. Otro punto di discusion a inclui e posibel desaroyo di un playa nobo pa bishitantenan den area di Bushiri, manera tambe e necesidad di reemplasa e palmanan daña banda di Eagle Beach Road.
Inversion y proyectonan di mehoracion
Resortnan tambe a comparti actualisacionnan tocante inversionnan y proyectonan di mehoracion cu ta andando actualmente. La Cabana Beach Resort & Casino recientemente a completa su deck nobo di pool, cu a haya un recepcion hopi positivo di parti di huespednan.
Casa del Mar Beach Resort ta sigui cu su plannan di renobacion, cual ta wordo comparti regularmente cu miembronan durante reunionnan bimensual. Playa Linda Beach Resort a haya aprobacion pa un edificio nobo di gym y spa, mientras cu Amsterdam Manor Beach Resort a completa su renobacion total y actualmente ta construyendo un facilidad nobo “back-of-house”.
Paradise Beach Villas pronto lo introduci un food truck nobo, renoba su restaurant di pool y haci mehoracionnan exterior, mientras cu Costa Linda Beach Resort ta continua inverti den mehoracionnan cu ta eleva ainda mas e experiencia di servicio pa huespednan.
President di ATSA, Sulaika Kelly di Playa Linda Beach Resort, a introduci e mas reciente boletin informativo di e asociacion, invitando tanto miembronan como publico general pa lesa e articulonan, actualisacionnan y iniciativanan colaborativo cu e publicacion ta contene. E boletin ta destaca e energia, innovacion y compromiso comparti cu ta sigui forma e industria di vacation ownership na Aruba y su contribucion na economia turistico di e isla.
Reconocemento pa excelencia den hospitalidad
E reunion a conclui cu felicitacionnan sincero na e propiedadnan miembro cu a gana e Tripadvisor Travelers’ Choice Awards 2026, e RCI Gold Crown Award, y reconocementonan Elite, Premier y Select di Interval International. E reconocementonan aki ta refleha nan hospitalidad excepcional y nan contribucion n’e popularidad y reputacion di Aruba como destino vacacional di nivel halto.
ATSA ta sigui aporta na economia di Aruba
Segun informe economico reciente, Aruba Timeshare Association ta continua di ta un organisacion di cual su contribucion ta hopi importante pa economia di e isla, y un componente esencial den e exito di One Happy Island.
ATSA tabata funda na 1994 y actualmente ta conta cu participacion activo di mayoria di e propiedadnan di vacation ownership na Aruba. E asociacion ta traha na nivel local hunto cu diferente organisacionnan y entidadnan gubernamental. Na nivel regional, unda Aruba ta sigui di ta reconoci como un destino modelo den vacation ownership, ATSA tin lasonan profesional cu ARDA (American Resort Development Association).
Miembronan actual di Directiva di ATSA ta:
Sulaika Kelly – Presidente
Rina Geerman – Secretaria
Pedro Vargas – Miembro di Directiva
Jurgen van Schaijk – Tesorero
Luigi Heredia – Miembro di Directiva
