Josue ta bisa den capitulo 24 vers 15 di e buki di Josue ami y mi cas ta sirbi Senjor.
E prome caminda cu un hende mester demostra cu e ta un bon Cristian y siervo di Dios ta na su cas.
Ta dificil pa bo ta bon mira riba caya como Cristian y yiu di Dios y na bo mes cas, nan no ta reconoce cu Cristo Hesus ta biba den bo, pasobra na cas bo ta diferente, bo ta zundra, pleita y papia palabra malo, bo no tin respet y bo hende di cas no tin respet pa bo.
Bo sa kico ta mahoso, y fastioso dilanti di Dios y hende ora un pareha casa ta comunica cu otro cu palabra malo, nan no tin respet pa otro, e homber ta manda un grandi y e muher ta contesta cu un grandi, e cos ey no ta netji y e pas di Dios no ta den e cas ey.
Bo cas of bo hogar mester ta teritorio di Dios.
Haci oracion den bo cas,
Canta Alabansa den bo cas.
Tene ayuno den bo cas.
Mantene bo cas liber di idolatria, bruheria y santeria.
Zorg pa tur hende den bo cas tin Cristo Hesus den nan bida.
Mantene bo cas liber di pleito y manipulacion.
Mantene bo cas liber di murmuracion y rebeldia.
Mantene bo cas liber di alcohol y droga.
No trece tur sorto di amigo of amiga den bo cas.
No permiti ilegalidad y ladronicia den bo cas.
Haci tur locual ta posibel pa mantene bo cas liber di mentira.
Mantene bo cas liber di pornografia, pasobra esey ta un causante grandi di adulterio.
No permiti weganan diabolico den bo cas.
Invita hende bin haci oracion na bo cas, y bay di acuerdo pa Dios por bendiciona y yuda otro.
Prepara bo cas pa e evangelio di Dios.
Laga bo cas ta un cas di amor, caminda hende por mira ehempel con nan tin cu trata otro.
Aleha amargura y odio for di bo cas, laga pordon prevalece tur momento.
No laga bo cas ta un cas di wega di placa, keda contento cu locual cu bo tin.
Sinja bo yiunan pa respeta hende y respeta nan mes, y mas cu tur cos pa nan tin temor di Dios.
Asina manera esnan cu a wordo escohi di Dios, santo y stima, bisti un curason di compasion,carinjo y humildad,mansedumbre,y pasenshi. Y boso soporta otro, y pordona otro,si un di boso,tin keho contra otro.Mescos cu Senjor a pordona boso,asina boso tambe mester haci.( Colosensenan 3 :12-14). Y ademas di tur e cosnan aki, bisti amor,cual ta e laso perfecto di unidad.
Sinja boso yuinan pa balora caminda nan ta biba, pa nan cuida e cas, mantene e cas limpi, mantene cura di cas limpi, respeta otro den e cas, y biba un bida puro y decente.
No sconde nada pa ningun amigo ni paden of pafo di cas. Keda corda den tur momento cu nos cas y nos bida ta di Dios, Nos curpa ta tempel di Spirito Santo kende ta den nos.
Pasobra tur cas ta wordo traha door di un hende, pero esun cu ta traha tur cos ta Dios. ( Hebreonan 3:4).
Haci oracion den bo cas y pidi Dios yena henter bo famia cu conocemento y disernimiento, spiritual, haci bo Famia un famia di Fe, Firmesa, y Fieldad.
Sigi perservera den oracion tur momento abo y bo famia, keda uni cu otro pasobra union ta haci forsa.
Bo cas ta teritorio di Dios awe y .pa semper, y pa semper.
Sinceramente, Pastor Marcel Balootje.