Diabierna mainta e bapor ARC 24 de Julio di Armada di Colombia a yega Aruba pa un bishita special durante e fin di siman. E bishita ta coincidi cu celebracion di Dia di Independencia di Colombia y conmemoracion di mas cu 200 aña di relacion diplomatico entre Colombia y Reino Hulandes. Na waf di Oranjestad, Prome Minister Mike Eman, acompaña pa su esposa Doina Eman-Neagoy, a ricibi capitan di ARC 24 de Julio. Durante e ceremonia oficial di bonbini, himno di Aruba y himno di Colombia a wordo toca. Tambe presente na e ceremonia tabata Minister di Turismo, Transporte y Labor, Wendrick Cicilia, miembronan di Parlamento, Consul di Colombia na Aruba, Gustavo Serrano Amaya, y director di Aruba Ports Authority N.V. (APA), Marc Figaroa.
Consul Serrano Amaya a splica cu ARC 24 de Julio ta un bapor completamente diseña y construi na Colombia, den instalacionnan di Armada di Colombia. E bapor a sali for di Cartagena y, despues di su estadia na Aruba, lo continua su biahe pa un otro waf. Durante e fin di siman, e comunidad tin oportunidad pa bishita e bapor na waf turistico di Aruba. Diabierna y diasabra e bapor ta habri pa publico di 9:00 di mainta pa 6:00 di atardi. Diadomingo e orario di bishita ta di 11:00 di mainta pa 6:00 di atardi. Entrada ta via Gate 4 y no tin ningun rekisito special pa bishitante por drenta. Diadomingo lo tin un celebracion special di 9:00 pa 11:00 di mainta den cuadro di Dia di Independencia di Colombia, cu oficialmente ta 20 di juli. Durante e actividad lo conmemora tambe 216 aña di independencia di Colombia.
Prome Minister Mike Eman a destaca e contribucion valioso di comunidad colombiano na desaroyo di Aruba. Segun Prome Minister, miembronan di e comunidad ta contribui cu nan talento, energia y dedicacion den tur faceta di nos sociedad. Prome Minister a indica cu bishita di ARC 24 de Julio ta brinda un oportunidad pa mustra no solamente hospitalidad di Aruba, sino tambe e calor y amistad cu ta existi entre pueblo Arubano y pueblo Colombiano. El a expresa admiracion pa e progreso cu Colombia a logra y pa e manera cu e pais a supera diferente reto. Tambe el a destaca e capacidad, specialismo y conocemento colombiano cu a haci construccion di un bapor avansa manera ARC 24 de Julio posibel.
E bishita ta reuni representantenan oficial y comunidad den un momento di amistad, reconocemento y celebracion. Alabes, e ta reafirma e relacion historico y cooperacion cu ta existi entre Aruba y Colombia.
