Biblioteca hubenil ta ofrece mucha di tur edad un coleccion grandi di buki pa lesa. Awemainta representantenan di Biblionef na Aruba, Sra. Carla van Eerden y su colega Sandra Postma a entrega otro cargo di buki pa baby, mucha y hoben na sra. Michelle Roos di Biblioteca Nacional Aruba. Un bunita coleccion cu biblioteca por fia su miembronan hoben. Biblioteca ta gradici Biblionef pa trece e bukinan Aruba.
Biblionef ta un instancia cu ta traha rond mundo pa stimula lesamento y laga tur mucha experencia e goso di lesamento. Biblionef ta traha pa mucha cu no tin acceso facil na buki y semper a traha hunto cu biblioteca. Biblionef Aruba ta parti buki na scolnan na Aruba ya pa mas cu 20 aña.
Biblioteca ta ofrece miembrecia gratis pa baby, mucha y hoben bou 18 aña. Esaki ta habri un mundo di buki, storia y informacion den diferente forma, tambe Ebooks y audiobooks. Miles di buki ta warda nan!
