Bonaire Human Rights Organization (BHRO) ta manda un alerta publico despues di lansamento di un campaña riba media social door di e Instituto Hulandes pa Derechonan Humano. Nan campaña tin como meta pa informa residentenan di Boneiro, Statia y Saba tocante derechonan humano den bida diario, incluso costo di bida, vivienda, cuido di salud, enseñansa y otro condicionnan basico di bida.
BHRO ta sostene firmemente educacion tocante derechonan humano. Sin embargo, nos preocupacion principal ta cu e informacion cu ta wordo presenta na publico mester mehora y refleha corectamente e realidadnan biba y e violacionnan di derechonan humano cu nos hendenan ta experiencia riba nos islanan. Pesey, BHRO ta stimula residentenan pa mehora nan evaluacion criticamente riba e informacion cu ta wordo presenta via e campaña aki.
E preocupacion aki ta basa riba BHRO su experiencia directo durante e revision di e cumplimento di Hulanda cu su obligacionnan door di e Comite di Nacionnan Uni pa Derechonan Economico, Social y Cultural (CESCR), cu a tuma luga na Ginebra dia 16 y 17 di september 2025. Durante e proceso ey, BHRO a biaha bay Nacionnan Uni na Ginebra y a entrega y expresa preocupacion tocante informacion relaciona cu Boneiro cu, segun nos evaluacion, no tabata refleha adecuadamente e realidad cu e pueblo ta biba diariamente.
Ta importante pa señala cu e conclusionnan posterior di Nacionnan Uni a identifica desigualdadnan serio y preocupacionnan continuo tocante e garantia y mehoracion di e egercicio pleno di derechonan economico, social y cultural. E Comite tambe a expresa preocupacion tocante e falta di informacion relaciona cu implementacion di e derechonan aki na Boneiro, Saba y Sint Eustatius.
Pa BHRO, e conclusionnan aki ta particularmente importante, pasobra nan ta fortalece nos preocupacion cu e realidadnan cu hende riba e islanan ta experiencia no tabata wordo refleha adecuadamente den e informacion presenta internacionalmente.
BHRO a presenta Nacionnan Uni cu informacion cu a bini directamente for di pueblo tocante pobresa, e costo halto di bida, vivienda, cuido di salud, enseñansa, discriminacion, desigualdad y e falta di garantia igual di derechonan fundamental. E contribucionnan di BHRO a yuda trese e realidad cu e pueblo ta biba diariamente directamente dilanti di e mecanismo internacional pa derechonan humano.
BHRO tambe ta preocupa tocante e echo cu Gobierno Hulandes ta financia e Instituto. Ora cu un instituto ta ricibi financiamento for di e mesun Estado cu ta spera cu e ta cumpli cu su obligacionnan di derechonan humano y mester evalua di manera independiente y critico, transparencia y garantianan efectivo ta esencial. Un relacion asina ta lanta preguntanan legitimo tocante independencia institucional, posibel influencia riba e informacion cu ta wordo presenta y e narrativa cu ta wordo comunica na publico y na mecanismonan internacional pa derechonan humano.
Dicon e Instituto Hulandes pa Derechonan Humano no ta cuestiona si e incorporacion di Boneiro den e orden constitucional hulandes, ignorando e deseo expresa y e decision democratico di pueblo Boneriano y bou di condicionnan di derechonan desigual, no ta di acuerdo cu Articulo 1 di tanto e Pacto Internacional tocante Derechonan Civil y Politico (ICCPR) como e Pacto Internacional tocante Derechonan Economico, Social y Cultural (ICESCR)? Esaki ta e derechonan fundamental humano di tur pueblo, incluso Boneiro na autodeterminacion, mediante cual nan ta determina libremente nan status politico y e rumbo di nan desaroyo economico, social y cultural.
Pesey, BHRO ta urgi e pueblonan di Boneiro, Statia y Saba pa mantene nan mes informa, haci pregunta, documenta nan experiencianan y evalua criticamente si e informacion presenta ta corresponde cu e realidad cu nan ta biba tur dia.
Educacion tocante derechonan humano ta importante, pero nos pueblo ta merece informacion cu ta independiente, corecto, transparente y basa riba nan realidad biba.
Bonaire Human Rights Organization