E accion pa mantene Aruba limpi y forsa e ley riba e uzo ilegal di tereno di gobierno ta duna resultadonan positivo caba. Vocero di Bureau City Inspector (BCI), Maikel Gomes, a reacciona sumamente satisfecho cu e cooperacion y respuesta rapido di e comunidad den e ultimo oranan.
Pueblo a scucha: Autonan ilegal ta disparce
E trabou di control di BCI y autoridadnan ta enfoca riba e autonan bandona y obhetonan cu ta poni ilegalmente riba tereno publico. Gomes a declara cu entre ayera y awe mainta, un diferencia notabel a wordo registra:
“Nos a nota un diferencia grandi. Mi ta kere e noticia a yega, pueblo a scucha y a atende. Tin hopi auto cu a lanta caba entre ayera y awe mainta. Ke men pueblo a scucha.”
Gomes a enfatisa cu tereno publico no ta un luga unda un persona por djis laga su pertenencianan of auto cu no ta funciona. BCI ta continuo y firme den e casonan aki pa garantisa cu ley ta wordo respeta y cu e espacionan publico ta keda liber y limpi.
Den nomber di Minister di Asuntonan General, e Director di Bureau City Inspector, Cuerpo Policial di Aruba (KPA), y tur e instancianan di gobierno cu ta colaborando den e proyecto aki, Gomes a haci un apelacion cu curason na e pueblo di Aruba pa haci bon uzo di e dianan aki.
E di dos edicion di “Cuida Aruba” ta tumando luga, y e obhetivo principal ta pa duna e oportunidad na cada ciudadano pa deshaci di nan sushedad y sushi na un manera responsabel, en bes di laga nan tira riba tereno publico.
Awe (dia 26), inspectornan di Bureau City Inspector hunto cu otro instancianan lo ta presente pa controla y haci sigur cu tur cos ta transcuri den ordo den e siguiente localidadnan:
San Nicolas: Na veld di Botica Central / Centro Medico
• Poochies: Baseball Field
• Barcadera: Incluyendo e zona di desperdicio
• Santa Cruz: Na veld di Winston
• Tanki Leendert: Colegio Oro Ubo
• Oranjestad: Na centro Playa Pa Bou
Un Mensahe Final pa Full Aruba
Bureau City Inspector ta anima tur habitante pa haci uzo di e punto di entrega aki. “Probecha e dia aki, full pueblo di Aruba, trece tur boso susiedadnan y haci bon uzo di e oportunidad aki pa nos tene nos isla limpi,” Gomes a conclui.
