Durante e reciente encuentro di trabou cu Minister Herde, representante di Fundacion COMPA, Aron Bislip, a pone riba mesa un serie di preocupacion profundo relaciona cu e proyecto controversial Burubundu. Fundacion COMPA ta subraya cu e puntonan treci dilanti ta demostra cu e proyecto ta carece di e rekisitonan legal y factibel necesario, mientras cu e tratamento di e peticionnan di transparencia ta keda laga hopi di desea.
Durante e reunion, unda a enfoke riba e crisis di vivienda y desaroyo na Aruba, COMPA a duna di conoce cu si no proteha mercado, no tin viabilidad. Maske cu no a papia directamente tocante e proyecto tur momento, na momento cu COMPA a haya palabra, a duna di conoce cu tin preguntanan basico cu ta keda sin wordo contesta tocante e proyecto Burubundu.
Segun Bislip, a splica e mandatario cu tempo ta hopi valioso y cu ora un proyecto no ta viable — manera ta e caso cu Burubundu y ora ta keda pusha un proyecto asina grandi sin e estudio nan necesario, esaki ta resulta den un “blunder”.
“Nos mester solucionnan viable, no gasolin riba candela,” ta e posicion firme cu Fundacion COMPA a trece dilanti.
Un punto durante e encuentro tabata e tratamento di e peticion bou di Landsverordening Openbaarheid van Bestuur (LOB). COMPA a señala cu despues di casi un kwartaal di corespondencia, nan ta contento cu a logra un reunion prome cu e fecha final di e decision-forming, pero cu hopi pregunta ta keda habri pa falta di transparencia.
Un peticion LOB pa minister a wordo manda for di 21 di juli. Despues di mandamento di un reminder y bay den bezwaar, a resulta mester a apela na e comision di LOB riba dia 9 di october ultimo. Maske cu minister a indica cu e peticion ta na departamento, COMPA ta recorda cu un LOB ta bay directamente pa minister, loke ta trece incongruencianan den e proceso administrativo. E organisacion ta subraya cu informacion publico ta crucial pa contesta e preguntanan pendiente.
Riba tereno di procedura, Fundacion COMPA a nota conflicto ora di compara e diferenciando mapanan di e Ruimtelijk Ontwikkelingsplan (ROPV). E fundacion ta constata cu studionan stipula no a wordo haci, departamentonan concerni no a wordo involucra debidamente, y cu no tin un base real (“anleiding echt”) ni un autor conoci pa e proyecto.
Maske cu un beleidsadviseur di e minister a duna di conoce durante e reunion cu e puntonan treci dilanti no tabata corecto, COMPA ta remarca cu e strategia di no inclui tur argumento legal for di cuminsamento ta pone e enfoke riba e deficiencianan sustantivo di e proceso.
Finalmente, den su contesta formal riba e Zienswijze, e departamento concerni a reconoce cu studionan obligatorio, stipulá den e Landsverordening ruimtelijke ontwikkeling, ta faltando. Sinembargo, Fundacion COMPA ta lamenta cu nan zienswijze no a ricibi un contesta riba niun di e puntonan cu a wordo treci dilanti.
Fundacion COMPA ta keda spera cu nan consehonan y advertencianan ta resona den e fase final di decision, urgiendo pa atende e retonan di desaroyo di un forma transparente, husto y legalmente solido.