Featured Local Politica

Booshi Wever : Control the words, control the culture and control the minds&QUOT


Den diferente articulo den pasado mi a urgi pa “lees tussen de regels door” ora ta trata di discursonan di
gobernante- y politiconan. Ultimo tempo mi a bin ripara cu e intencion di e politico ta pa NO papia e
berdad. Alcontrario e intencion ta pa ta convincente den troce e berdad lo maximo posibel y si e
intencion aki faya anto mester tin semper “a way out” ora e politico wordo gara ta gaña. Ta p’esey ta
den nos man pa trata na averigua kico exactamente ta e diferencia entre realidad y loke e gobernante
kier “bende” nos como realidad. Esaki ta simpelmente "manipulacion"!
E ehercisio pa lesa “tussen de regels door” den mundo linguistico ta wordo categorisa como un ehercisio
den “SEMANTICS ”, loke ta nifica un estudio den significado di palabranan. Nos no mester enfoca
solamente riba e palabra cu ta wordo expresa, pero principalmente riba e significado di e palabranan.
Un ehempel bibo ta loke nos Prome-Minister entre otro ta trata na haci cu e medidanan cu ya caba a
cuminsa wak luz di dia.
Den e debate encuanto e revocacion di 12.6% di salario nos Prome-Minister den pasado a expresa cu pa
Aruba bin na remarca pa ayudo financiero, Hulanda a exigi pa reduci gasto di personal. Reduci gasto di
personal NO tabata tin nada di haber cu e pandemia. Pero ta algo cu desde 2014 Aruba a cumbini cu
Hulanda!! Y esaki mester ta algo cu nos como pais mester kier.
Ta prohibi pa lubida cu na januari 2020 nos Prome-Minister a bay cu urgencia Hulanda pa evita un
“aanwijzing” pa motibo di MAL GOBERNACION. Durante e pandemia a haci un apelacion na trahador
publico pa ta solidario cu esnan cu ta traha den sector priva y pa nan entrega un parti di nan salario.
NUNCA esaki tabata e intencion pa “tapa” buraco financiero di pais Aruba, pero pa yuda esnan cu a
perde gran parti di nan entrada.
Awor cu FASE no ta wordo continua, no ta necesario mas pa solidarismo di parti di e trahadornan
publico!! Sinembargo gobierno a haya ta necesario pa sigui cu e 12.6%. Aki por tin dos splicacion.
Na prome lugar Aruba ainda NO a sali for di awanan bruto y e entrada extra aki ta necesario y de facto
NO a baha gastonan den e aparato publico structuralmente.
Otro splicacion ta esun berdadero, esta cu e exigencia di Hulanda. Esta di baha e gastonan die aparato
publico structuralmente y duradero. Un exigencia cu NO tin nada di haber cu e pandemia, sino cu ya
tabata e conoci desde 2014. Y e gobierno actual mes a duna di conoce cu e manera cu nan kier baha
gasto ta pa entrega 12.6%!!
E motibo ta obvio! Ta pa nan sigui yena e aparato publico cu mas hende.

Y awor kier bin hunga e wega di palabra. E Prome-Minister sa for di un principio cu ela cumbini den
Protocol 2018 y den Landspakket cu esaki lo mester ta definitivo pero awor cu e rosea di e empleadonan
publico ta den su nek, e kier hasi maniobranan y ta bin hunga atrobe e rol di Pontius Pilatus esta di “yo
no fui”.
Su problema ta cu e berdad ATROBE a sali na cla y cu ta su gobierno a acepta pa entrega nos autonomia
di tal forma cu ni su gobierno ni Parlamento tin algo mas di bisa. Ta Hulanda ta manda. Tambe ta asina
cu nos Prome-Minister ta sigui insisti pa bende nos un 6 pa un 9 cu palabranan cu cada bes ta cambia di
significado: "control the words, control the culture and the mind"!
Esaki ta un peliger eminente pa nos democracia! Enbez di acepta cu un biaha mas ela gaña, Prome
Ministro Croes ta prefera di tira culpa riba otro y trata di silencia tur esnan cu NO ta apoya e gobierno
mediocre aki. Cu tipo di actitud asina masha liher nos lo yega na dictadura particularmente ora cu
Pueblo por ta testigo cu ta nan tin un Parlamento actual di puro marioneta. Nos no por acepta
manipulacion cu palabra, pasobra te net esey ta loke a hiba nos den e situacion actual y e gobierno nobo
no ta nada diferente. Ta pesey e conclusion ta: NAN TA MESCOS CU E OTRONAN!

Related posts

SV La Fama Damas a duna reconocimento na su hungadonan pa tremendo temporada

EA News Author

Na Aruba a keda intruduci samenscholingverbod un biaha mas

EA News Author

investigacion andando a hiba seccion crimen organisa a haci tres entrada judicial aer mainta

EA News Author

Leave a Comment