Durante e reciente conferencia di IPKO (Interparlementair Koninkrijksoverleg), Bote ter Steege, ex-procurador general di Aruba y ex-hefe di Ministerio Publico di Hulanda Caribense, a pidi atencion serio pa e cuestion di siguridad riba e islanan. Awor cu e situacion financiero ta mustra significativamente miho, Ter Steege ta enfatisa cu inversion den siguridad no por keda atras.
Ter Steege a ser invita pa IPCO pa comparti su experiencia i vision riba seguridad den e sentido mas amplo di e palabra. E ex-procurador a duna un mensahe fuerte na e mandatario- i parlamentarionan presente.
Inversion den e cadena di seguridad
Awor cu e situacion economico y financiero ta recuperando specialmente na Aruba , y cu tin fondonan di inversion disponibel, Ter Steege ta spierta pa no lubida e pilarnan fundamental di siguridad.
Fondonan di inversion ta excelente, pero no lubida ‘siguridad’. No lubida KIA, no lubida cuerpo policial, y no lubida Ministerio Publico,” Ter Steege a duna di conoce.
Segun e experto, siguridad ta un inversion necesario cu ta costa placa. El a agrega cu siguridad no ta un cuestion di pone camara di vigilancia so: “Mester tin rechercheurs, mester tin personal suficiente cerca Ministerio Publico, y mester tin un bon prizon cu personal prepara pa asina esnan cu comete delito por comparti nan castigo di e forma correcto.”
Un punto cu Ter Steege a resalta particularmente ta e falta di un autoridad of instancia pa e asina yama casonan di TBS (Terbeschikkingstelling) na e islanan. E ta referi aki na personanan cu a comete delitonan hopi grave, cu mester sinta un castigo di prizon, pero cu despues tin mester di cuido y tratamento obligatorio pa motibo di nan trastornonan mental.
Mester percura pa e personanan aki ricibi e tratamento necesario. Si nan drenta bek den sociedad sin a ser trata, esey ta peligroso y insigur pa comunidad. E personanan aki tin un problema den nan cabes y mester di ayudo. P’esey, percura pa inverti den esaki.
Ora a puntre si siguridad mester bira un prioridad mas halto riba e agenda politico, Ter Steege a contesta cu su preocupacion mas grandi ta cu e tema simplemente ta ser lubida ora tin otro proyectonan grandi riba mesa. E ta boga pa un balansa entre e plannan grandi di desaroyo y e mantencion di orden publico.
Politica hopi biaha tin e tendencia di focus riba proyectonan grandi, manera e transicion di energia cu ta tumando luga na Aruba. Esey ta fantastico y mi ta realisa cu e ta costa hopi placa. Pero mi peticion ta: no lubida di reserva placa tambe pa siguridad, manera mi caba di duna di conoce,” Ter Steege a conclui.
Bote ter Steege: Cuida fondonan, pero no lubida seguridad di e islanan
