Cuminsando diabierna 14 di october, Oficina Central di Estadistica (CBS) ta organiza un encuesta tocante mucha y hoben Encuesta di Mucha y Hoben 2022. E proposito di e encuesta aki ta pa haya un mihor bista di diferente tema di importancia pa mucha y hoben. E encuesta lo tin un duracion di 1 luna.
E encuesta ta toca temanan manera por ehempel actividadnan di mucha y hoben den nan tempo liber (deporte, arte, trabou boluntario), participacion na scol, participacion riba mercado laboral, bista riba nan futuro, relacion cu mayor, uso di celular, medionan social, gaming y posibel problemanan relata na esakinan, humamento/vaping, uso di alcohol y droga y salud mental. CBS ta encarga pa colecta, suministra y analiza datonan riba diferente terreno y tin como meta principal pa suministra estadisticanan relevante, valioso y di calidad halto pa tur usuario.
Durante di e Encuesta di Mucha y Hoben 2022 mucha y hoben entre 4 pa 24 aña di edad lo wordo acerca pa coopera cu e encuesta. Pa un mucha of hoben cu ta menor di edad por participa, mester di e aprobacion di un mayor of voogd. Un total di 3.500 hogar lo wordo bishita door di encuestadornan di CBS. Encuestadornan por wordo indentifica cu un badge cu nan nomber, potret y e logo di CBS.
Encuestadornan lo traha parti atardi pa anochi pa asina por entrevista muchanan y hobennan den nan hogar. E encuesta lo wordo hasi digitalmente pa medio di un cuestionario riba un tablet.
Tur informacion colecta durante e encuesta aki ta wordo procesa anonimamente y ta publica solamente estadisticanan den forma agrega. E informacion di tur mucha y hoben ta contribui na mehora e disponibilidad di informacion pa por tin un mihor bista riba e desaroyonan cu ta tuma lugar cerca mucha y hoben na Aruba. Pa e motibo aki e contribucion di cada mucha y hoben ta esencial!
Nos ta gradici tur mucha, hoben y mayor/voogd di antemano pa nan participacion na e Encuesta di Mucha y Hoben 2022.