ORANJESTAD, Aruba
Pa por a mitiga e transmision di e virus y maneha miho e brote di covid-19 cu a tuma lugar den “Hot Zone” na Aruba, a introduci diferente cambio den maneho entre otro activacion di e nr 280.01.01.
Despues di mas cu 4500 test haci y mas cu 450 caso positivo por conclui cu tur esnan cu a keda contagia den “Hot Zone” a wordo indentifica y a wordo isola. Awor ta sigui indentificacion di e “tweede kring” cu ta ensera esnan cu por a keda contagia pa es cu tawata den “Hot Zone”. Esakinan ta ensera den gran parti esnan cu ta biba den cas (bou mesun dak) cu e persona positivo y tambe e pareha di e persona positivo. E personanan aki ta esnan mas na risico y pa cual motibo e personanan aki lo mester bay den cuarentena.
Atravez di “contact tracing” Departamento di Salud Publico lo tuma contacto cu esnan cu ta biba cu un caso positivo y lo duna tur instruccion nesesario.
Esnan cu por a comparti un rato cu un persona cu despues a resulta positivo ta wordo instrui pa tuma tur medida di prevencion nesesario na tur momento. E personanan aki no ta bay den cuarentena, por sigui traha normal cu e condicion cu nan ta aplica tur protocol estrictamente y na prome indicacion di sintoma ta tuma contacto cu nan dokter di cas.
Un suplica ta bay na comunidad pa no yama e nr 280.01.01 pa haci pregunta. E nr aki ta estriktamente pa yuda den e brote aki, unda persona cu sintoma y cu mester wordo getest por haya ayudo mas liher posibel. Si bo no tin sintoma bo persona lo no wordo getest y si bo ta pensa cu bo por tin e virus pasobra bo tawata tin contacto cu un persona positivo. Aplica tur medida di higiena entre otro bo “mondmasker” y e dia cu sintoma parece ta yama dokter di cas pa por hasi un test.
E proseso normal ta ensera cu un persona cu sintoma ta yama su dokter y cas y dokter di cas ta percura pa su pashent por test na laboratorio di hospital
Den e brote aki centro diagnostico di DVG a yuda pa maneha e brote y awor cu e brote di “Hot Zone” a wordo mitiga y tur persona indentifica nos ta bay bek na sistema y maneho normal unda dokter di cas ta atende su pashentnan cu tin sintoma.