En conexion cu e proyecto ‘Plataforma Folklore den Sector Turístico’ na Departamento di Cultura Aruba (DCA), DCA ta yama un reunion di suma importancia cu e gruponan di Musica Folklore, Baile y Caha di orgel, y hunto lo bay tin un persona di belastingkantoor cu lo bin duna un splicacion tocante con pa maneha e aspecto di belasting na momento di registracion na tur e gruponan cu ta desea di forma parti na e Plataforma Folklore den Sector Turistico.
E fecha di e reunion aki ta diaranson 1 di December 2021, pa 10:00 am na J.F. Kennedy Education Center Stadion weg # 37 den sala MFR-1 y 2.
Pa nos por yega na un conclusion caminda tur hende ta conforme con e sistema di belasting ta funciona pa e entretenimento den e Sector Turístico. Asina por duna balor na nos artistanan local, door di crea e posibilidad pa nan tin presentacion structural bou condicionnan faborabel.
Ta p’esey nos di DCA ta haci e yamada un biaha mas cu ta di suma importancia pa cu e proyecto Plataforma aki, pa duna informacion caminda nos a keda tambe riba 12 di september 2019. Uno cu no tabata tin suficiente gruponan cu a haci acto di presencia debi na otro compromisonan y tambe no tabata suficiente cla na esnan cu tabata presente.
Nos di DCA ta conta cu bo presencia riba dia 1 di december proximo, pa nos por yega na e pasonan final pa e Plataforma por cuminsa draai den su desaroyo.
