Diabierna ultimo 16 di augustus a tuma luga e di dos dialogo entre Minister di Transporte,
Sr. Ursell Arends y siete representante di Taxistanan y nan represenatntenan legal
na Bestuurskantoor. E reunion aki ta continuacion di dialogo riba dos decreto
ministerial cu ainda no a bai na vigor.
E prome decreto ministerial, den cuadro di transparencia, a enfoca riba puntonan
di interes general, en particular crea oportunidad igual pa tur cu ta desea di bin na
remarke. E di dos decreto ministerial ta cu lo aumenta e capacidad permisibel di
asiento den vehiculo di taxi, di 5 pa 7 asiento. Tur dos decreto por encontra riba
Publico.aw .
Minister Arends a asegura na e taxistanan cu ela bin pa scucha nan y presenta nan
su punto di bista pakico e cambionan den e decreto ministerial ta necesario. E dos
puntonan primordial ta pa oportunidad igual y combati corupcion.
Un di e preocupacionnan tabata e reglamento di pensioen pa Taxistanan, pa esaki
Minister a tuma e iniciativa riba su mes pa acerca pensioenfonds nan pa wak ki
posibilidad tin pa e taxistanan. E posibilidad tey pero taxistanan mester organisa
nan mes y regla nan situacion financiero. Un prome paso ta pa inscribi na Camara
di Comercio.
Despues di e prome sesion cu e taxistanan cu a tuma luga diamars 6 di augustus,
Minister a presenta concepto pa e ehecucion di su maneho relaciona cu traspaso
di permiso, incluyendo interes general y oportunidad igual pa ciudadanonan cu
kier yega na remarke pa un permiso.
Minister di Transporte tambe lo yuda y facilita e titularnan di permiso te unda ta
posibel, pa yega na areglonan financiero responsabel, incluyendo pensioen,
seguro y cumplimento cu deber fiscal.
Minister Arends ta reafirma su compromiso pa garantisa oportunidad igual den
transporte publico. E maneho tambe lo dedica atencion na empodera e posicion
di hulpchauffeurs y cambio den un sistema tradicional cu a trece cu ne
privilegionan pa un grupo cu no necesariamente sirbi interes general.
Cu e puntonan di ehecucion di e maneho, Minister Arends ta percura pa titularnan di
permiso no wordo afecta na un forma irasonabel.
Minister di Transporte lo sigui dialoga cu taxistanan riba e topiconan di e concepto
di y diaranson 21 di augustus lo sinta cu nan atrobe.