E sektor turístiko ta e sektor di mas grandi di ekonomia di Boneiru. Entidat Públiko Boneiru ke promové un sektor di turismo resiliente i salú, kaminda e enfoke ta riba turismo di kalidat. Aparte di esaki nos ‘Plan di Rekuperashon di Turismo’ ta alegá ku partisipashon di komunidat den desaroyo di turismo i preservashon di nos identidat i kultura lokal ta esensial pa krea un destinashon turístiko sostenibel.
‘E turismo di kalidat ku nos ta aspirá no mester ta na benefisio di solamente empresa i turista, pero netamente na benefisio di nos poblashon lokal tambe. Aktualmente hopi biaha tin un buraku entre e kalidat deseá i e forsanan laboral ku ta disponibel na nos isla pa ofresé e kalidat akí’, asina diputado Thielman ta indiká. ‘Pa promové desaroyo di konosementu lokal, Entidat Públiko Boneiru a hasi posibel pa sigui kurso kompletamente finansiá na Fundashon FORMA, den kolaborashon ku TCB i BONHATA’.
Den promé instante e kursonan ta enfoká riba sektor turístiko, pero tur hende tin mag di inskribí, hende ku ta traha den un otro sektor tambe i ku tin interes pa bai traha den sektor turístiko. Otro aña nos ke bai amplia e kursonan pa otro sektornan. Registrashon pa bini na remarke pa e kursonan grátis ta kana via Fundashon FORMA. Pa mas informashon por tuma kontakto ku Pamela Beukenboom.
Entretantu un promé treinen a tuma lugá: Higiena sosial/HACCP/ Siguridat di Kuminda, kaminda e partisipantenan a terminá e treinen eksitosamente i ku un sertifikado. ‘Ku e kurso akí nos no ta siña solamente kon pa protehá e wèspetnan i e empresa kontra situashonnan indeseá, pero tambe nos mes. Mi a siña hopi kos durante e kurso akí i mi ta agradesido pa e oportunidat akí’, segun un di e kursistanan.
Den e promé siman di desèmber ta kuminsá ku kuater kurso nobo. Por haña mas informashon riba e foyeto. Den transkurso di e próksimo aña kalendario ta bai amplia e oferta di kurso. Sigui Openbaar Lichaam Bonaire, Gobièrnu di Boneiru, FORMA, TCB i BONHATA riba Facebook pa keda na altura di e desaroyonan.