E recompensa di humildad, y e temor di Senjor, ta rikesa honor y bida.( Proverbionan 22:4).
Humildad ta habri tur porta den bida di hende, mientras cu orguyo, arogancia, cabesura, terkedad,ta pone hende perde bon oportunidad den bida.
Un bon manera di papia, un actitud decente, semper lo tin stoel pa sinta, mientras cu mal manera, falta di respet, boca sushi, griteria,indecente , hende lo evita di trata cu un persona asina.
Esakinan ta cosnan cu nos tin hinca den cabes di nos yuinan for di chiki, pasobra educacion ta cuminsa na cas, y si bo no ricibi bon educacion na cas, riba caya lo bo no tin, si na cas bo no tin horea, con bo ta haci alcanse riba caya.
Si na chikito bo no come bon den educacion, na grandi bo ta perde balansa di bida, y ta esey ta locual ta pasando, si bo no por coregi un mucha ora e tin seis anja, con bo ta haci controle ora e tin diesseis anja.
Dios den su palabra ta manda hopi aviso pa nos ta humilde y permanece humilde:
Pasobra ken cu halsa su mes, lo wordo humiya, y esun cu humiya su mes lo wordo halsa.(Lucas 14:11).
E ta guia e humildenan den huicio,y E ta sinja e humildenan Su caminda. (Salmo 25:9).
Haci mi goso completo door di keda,di acuerdo cu otro,manteniendo e mesun amor,uni de spirito,teniendo un solo proposito,No haci nada cu actitud di egoismo,of orguyo, ma cu humildad,laga cada un di boso,considera e otro mas importante cu su mes. No busca boso interes personal so, ma busca interes tambe di otronan,( Philipensenan 2 :2-3-4).
Ma E ta duna gracia mas grandi ainda. Pesey scritura ta bisa: Dios ta resisti e orguyosonan ma ta duna gracia na e humildenan.( Santiago 4:6).
Humiya boso mes anto den e presencia di Senjor, y E lo halsa boso.( Santiago 4:10).
Pasobra Senjor ta hiba gusto den Su pueblo, E ta dorna e afliginan cu salbacion.(Salmo 149:4).
Asina manera esnan cu a wordo scohi di Dios, santo y stima,bisti un curason di compasion,carinjo, humildad,mansedumbre y pasenshi .( Colosensenan 3:12).
Tur hende por nota bon cla cu Humildad ta bini di Dios, y cu orguyo ta bini di diabel, y si Dios ta rechasa algo con nos cu ta su yuinan por acepte y biba cune, esey ta danja nos relacion cu Dios, pasobra si nos bida ta di Dios, nos tin cu tene cuenta cu humildad mester bini nan prome lugar.
Humiya boso mes anto, bao di e man poderoso di Dios, pa e por halsa boso na e tempo apropia,tirando tur boso preocupacion riba dj’E pasobra E ta percura pa boso.( 1 Pedro 5:6).
Hende humilde ta confia Dios, pero esnan orguyoso, semper lo murmura, pasobra nan ta lubida hopi lihe locual Dios a haci pa nan.
Finalmente rumannan, boso sea di un acuero cu otro,teniendo compasion,cu otro, stimando manera ruman, y sea misericordioso y humilde den spirito, no pagando malo cu malo, of insulto cu insulto, ma mas bien dunando un bendicion, pasobra boso a wordo yama pa e proposito aki,pa boso hereda un bendicion.
Humildad ta trece bendicion, humildad ta trece pas,humildad semper ta bini di Dios.
Un curason humilde y un mente sano ta evita tur clase di discucion , pasobra un curason humilde ta comunica cu Dios, y no ta busca su propio interes, pero semper ta wak bienestar di otronan.
Un curason humilde semper ta pidi despensa, semper kier ta mas serca esnan cu ta den necesidad, pa por ta un ayudo, y percura pa nan bienestar.