Ayera ‘tardi na El Tributo Jan Noorduynweg, a tuma lugá un eksperensia eksklusivo dediká na media lokal. Den un bishita guiá, miembronan di prensa a haña e oportunidat úniko pa wak tras di kortina di nos krematorio nobo. E krematorio nobo ta un fasilidat ku a kuminsá operá fo’i komienso di e aña aki, pero sin un lansamentu ofisial.
Ku e lansamentu ofisial di e krematorio, El Tributo ta marka un momentu históriko:
”Despues di 20 aña porfin famianan finalmente por skohe kaminda nan ser kerí por wòrdu kremá.”
”E fasilidat aki no ta solamente un edifisio nobo, sino un ekspreshon di nos kompromiso pa keda inovativo, transparente i sirbi famianan ku un servisio totalmente integrá,” ta palabra di Sr. Haidel Haile, direktor di El Tributo.
Famianan ku ta skohe pa hinka e despedida di nan ser kerí bou di kuido di El Tributo, mester tuma nota ku e proseso di kremashon lo tuma lugá den nos propio krematorio. Esaki ta partí di e servisio integrá ku nos ta ofresé pa garantisá komodidat, kontinuidat i un despedida sin komplikashon.
E krematorio nobo aki ta kompletamente ekipá ku teknologia moderno i ta un agregashon sublime di e kualidat di servisio ku El Tributo ta ofresé.
”For di e promé yamada, organisá e despedida, te n’e momentu sagrado di
kremashon, famia por konta riba nos tim profeshonal i dediká.”
Den un atmósfera íntimo i ameno, media lokal por tabata testigu kon El Tributo ta realisá su lema: ”Honrando Bida Na Bo Manera”
El Tributo ta keda komprometé pa sigui habri e portanan (literal i simbólikamente) sin distinshon, pa tur famia sin importá rasa, kultura, kredo òf kreensia. Nos ta konsiente ku pa por sigui meresé pueblo di Kòrsou su konfiansa, nos mester keda elevá e standart di un despedida ku amor, kompashon i dignidat. Na Bo Manera.
Famianan ku kier sa mas tokante e posibilidatnan di kremashon na El Tributo por tuma kontakto ku nos via nos e-mail entiero@eltributo.cw òf página di Facebook.