Aruba Karate Bond (AKB) a sali pa Boneiro pa participa na e campeonato “ABC” cual ta tuma luga diasabra 26 di februari na Club Soho Bonaire na Boneiro. E campeonato “ABC” ta masha popular y ta wordo organisa anualmente entre e islanan Aruba, Boneiro y Corsow. Meta di e campeonato “ABC” ta pa hisa e nivel di karate entre e islanan, siña di otro y stimula compañerismo.
Participacion
E atletanan Juan David Velasquez y Alejandro Gonzalez Lujan lo participa den e categoria Senior (18+) tanto den seccion ‘kata’ (tecnica di karate) y ‘kumite’ (pelea/bringamento). Preparacion y sosten di e team ta den man di coach, “Sensei” Alberto Gonzalez Lujan. Otro miembro di directiva cu tambe a biaha ta “Sensei” Gustavo Velasquez. Su persona lo participa den funccion di arbitro. AKB ta desea e team hopi exito.
Gradicimento
Presidente “Sensei” Felix Tromp ta gradici tur cu a contribui na e biahe aki. Na prome luga un danki grandi na Arubabank kende a patrocina e uniform oficial. Na di dos luga un danki na Totto Aruba pa confecciona esaki y na di tres luga un danki na Setar NV kende a contribui den e gastonan. Por ultimo, un danki na tur karateka miembro di AKB y nan mayornan, Stichting Sportsubsidie Aruba, Fundacion Lotto pa Deporte y Comite Olimpico Aruba kende semper a sa y ta apoya AKB.