ORANJESTAD,Aruba
Parlamentario Alan Howell a mustra preocupacion pa loke ta trata e atraconan cu a bin ta tumando lugar riba nos isla. Den cuadro di su preocupacion pa haya sa con Ministerio di Husticia ta atendiendo e situacion aki y tambe pa haya informacion di e cantidad di detencionnan realisa y e pasonan tuma pa prevencion, pa medio di Presidente di Parlamento, el a pidi pa Minister Andin Bikker acudi na Parlamento pa un vragenuur.
Howell ta indica cu atraco arma riba nos ciudadanonan y turistanan ta inaceptabel. E tipo di crimennan aki cu ta wordo considera como ‘high impact crimes’, ta trece insiguridad y panico den pueblo. E ta remarca si cu Atraco Team ta trahando incansablemente riba e diferente casonan y ta solucionando mayoria tambe. “Pa tal motibo mi a haci uzo di mi derecho como parlamentario pa yama Minister di Husticia aden pa bin Parlamento y duna cuenta di su maneho den un asina yama “Vragenuur”.
Esaki ta e preguntanan realisa door di parlamentario Alan Howell na Minister di Husticia y cual lo wordo contesta diabierna awo pa 11or di mainta durante e vragenuur den Parlamento.
- Di november 2019 pa januari cuanto atraco a tuma lugar riba Pais Aruba?
- Cuanto di e atraconan aki a wordo soluciona?
- Cual ta e nacionalidad di esnan cu ta cometiendo e atraconan riba nos isla?
- Den caso cu ta trata di extranheronan, minister por a contempla pasonan specifico pa haya un solucion sostenibel y efectivo pa cu e malhechornan aki?
- Cuanto di esakinan a wordo trata den corte caba?
- Cual ta e castigo cu a wordo exigi pa cada un di e casonan aki?
- Cual ta e pasonan cu a wordo tuma pa preveni mas atraco?
- Teniendo na cuenta cu turismo ta nos pilar economico, ki pasonan adicional a wordo tuma pa preveni atraconan den e area turistico?
- Hotelnan, joyerianan, banconan y otro negoshinan vunerabel a wordo poni na haltura y conseha pa tuma extra precaucion di nan parti tambe?
- Departamento di Atraco Team tin suficiente material y personal?
- Si e respuesta na e pregunta anterior ta negativo, cual ta e pasonan cu ta wordo tuma pa haya un solucion duradero pa cu e situacion aki?
- Con Parlamento por contribui na logra un solucion sostenibel?
