Parlamentario Alan Howella expresa cu e ta hopi contento di por a scucha for di gobierno, specificamente Minister Glembert Croes y tambe Prome Minister Evelyn-Wever-Croes cu lo extende FASE te december 2020. Na varios ocasion Howell a conversa cu Minister Croes pa follow up y sigura cu nos hendenan ta bay sigui cobra FASE.
Di e manera aki gobierno ta demostrando e sosten cu ta brindando esnan cu keto bay ta sintiendo e efectonan fuerte di e Corona Crisis, cu debi na e pandemia aki nan a perde nan entrada y cu tin mester di e sosoten.
Parti di e sosten aki ta bin for di e cooperacion cu trahadornan publico ta dunando door di entrega 5% di nan salario, mustrando asina tambe cu nan ta para hunto cu esnan mas perhudica door di e crisis cu nos pais ta bibando na e momentonan aki.
“E ayudo aki, e cooperacion aki ta hopi necesario. Ta hopi famia ta pasando den duro debi cu nan a perde trabou y sin e ayudo di FASE nan no lo por pone un pida pan riba mesa pa nan famia. Pesey mes mi ta aplaudi e decision di gobierno pa extende FASE te december. Ban spera cu e situacion mehora pa cada un di esnan cu tin mester di e cooperacion aki por logra haya un trabou y por para un biaha mas riba nan pia”, Alan Howell a bisa.
Na final el a recorda tur ciudadano cu ta cobra FASE pa zorg pa prolonga na peticion pa e luna di october aki pa nan no keda sin cobra.