For di sifra ku ofisina sentral di statistik (cbs) a publiká awe ta indiká ku e nivel di preis promedio a subi ku 0,1 porshento na luna di òktober 2020 kompará ku luna di sèptèmber 2020. E sifra di inflashon a keda 2,3 porshento.
Desaroyo di preis luna di òktober 2020 kompará ku luna di sèptèmber 2020
E sifra índise di preis pa konsumidó (cpi, “consumer price index”) di kòrsou a subi ku 0,1 porshento na luna di òktober 2020 kompará ku luna di sèptèmber 2020, esta di 136,4 na sèptèmber pa 135,7 na òktober 2020.
E kambionan di preis spesífiko ku mas a sobresalí durante luna di òktober 2020 ta; a bira mas karu sigaria (1.3%), batata, berdura i fruat (1,1%), suku i chukulati (1,0%), i karni i piska (0,9%) i lo kual a bira mas barata ta kerosine (-5,6%), elektrisidat (-1,9%) i vèt di alimento (-0,2%)
Desaroyo di preis luna di òktober 2020 kompará ku luna di òktober 2019
E cpi di oktober 2020 (136,5) ta 2,2 porshento mas haltu ku e cpi di oktober 2019 (133,6). E sifranan aki ta indiká ku e nivel di preis pa konsumidó durante luna di sèptèmber 2020 ta 2,2% mas haltu kompará ku e mes un luna na 2019.
E kategorianan ku a kontribuí mas tantu na e subida aki ta bebida, sigaria, komestibel i salubridat.
Desaroyo di preis riba término largu: Inflashon òktober 2020
Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba término largu (usualmente 12 luna). E sifra di inflashon pues ta duna un indikashon di e subida promedio di kosto di bida, i p’esei ta ser rekomendá komo instrumento pa indeksashon di salario, penshun, ònderstant/ benefisio sosial, suèldu mínimo i otro entrada.
Inflashon den un sierto luna ta ser kalkulá dor di komparashon di e cpi promedio di 12 luna den e luna konserní ku e cpi promedio di 12 luna den mes luna e aña anterior. Si kompará e periodo di e último 12 luna te ku sèptèmber 2020 ku mes periodo un aña anterior, ta resultá ku preisnan na averahe a subi ku 2,3 porshento: E cpi promedio di 12 luna a desaroyá di 131,5 na òktober 2019 pa 134,5 na òktober 2020.
