Minister di enseñansa y deporte Endy Croes a reuni cu IBISA

Recientemente Minister di Enseñansa y Deporte Endy Croes, a continua cu diferente reunionan riba e tereno di enseñansa y deporte, a toca turno cu e ekipo di maneho di IBISA, sr.Edgar Erasmus y sr. Christiaan Goedhart.

IBISA ta un di e departamentonan di Gobierno, bon conoci cu ta traha cerca di deporte y nos atletanan “E tabata un bon reunion, nos a elabora riba e vision y direccion di ministerio di deporte, hunto cu IBISA nos lo percura pa realisa e plan; pa hiba deporte bek na scol”, e mandatario a expresa.

Minister di Enseñansa y Deporte Endy Croes a duna un primicia di un di e proyectonan cu lo ta un competencia escolar cu ta consisti di diferente deporte pa hobennan di 4 -5 y 6 klas di scol basico. E competencia lo tin premionan atractivo pa e scol, pronto mas detaye lo wordo anuncia. E mandatario a finalisa bisando cu 2022 lo ta un aña grandi y bunita pa enseñansa y deporte.