E bahada di kasonan di kontagio ku a kuminsá den e periodo di 1 te ku 23 di yanüari 2022 a kontinuá den e siman di 24 te ku 30 di yanüari 2022. Di e 949 hendenan ku a tèst den e siman di 24 di yanüari 2022, 477 hende a tèst positivo. Den e siman di 17 di yanüari 2022 tabatin 752 persona ku a tèst positivo.
Departamento di Salubridat Públiko ta kontentu ku e sifranan nobo akí. E sifranan ta duna speransa, pero nan ta mustra tambe ku ainda mester anda ku koutela. Esaki pasobra for di e sifranan ta resultá ku no opstante e bahada, te ainda relativamente hopi hende ta pega ku e vírùs. P’esei ta importante pa siudadanonan ku tin keho òf un resultado positivo di un tèst propio bai mesora den isolashon i bai tèst na Salubridat Públiko. Asina nan por evitá ku nan ta pega otro hende.
Den práktika hendenan tin e tendensia pa tene nan mes ménos na e reglanan di corona ora ku e sifranan di kontagio baha. Miéntras ku nèt e ora ei ta mes importante pa kumpli ku e reglanan di corona i di e manera ei evitá kontagio.
Bo tin keho? E ora ei bo por hasi un tèst propio òf yama 0800 0800 pa un sita pa tèst. Resultado di e tèst propio ta positivo? Yama 0800 0800 i bai hasi un tèst di PCR grátis pa bo sa sigur si enbèrdat bo tin corona. Semper bo tin ku warda resultado di e tèst den isolashon na kas.
Bo no a pasa e anguanan kontra corona òf e angua di buster ainda? E ora ei wak riba www.bonairecrisis.com pa un bista general di e dianan ku bo por bai pasa e anguanan kontra corona òf e angua di buster sin sita.
E kantidat di persona ku a tèst positivo den e total di hendenan ku a bai tèst, a baha den e siman di 24 di yanüari 2022. Den e siman di 17 di yanüari 2022 ainda tabata trata di un kantidat igual na 57,4%. Siman pasá e kantidat akí tabata igual na 50,3%.
