Futuro di turismo na Boneiru ta rekerí eskoho dirigí
Bonaire Hotel and Tourism Association (BONHATA) a presentá resultado di un investigashon amplio di e impakto ku turismo tin riba nos isla. E estudio ku Economisch Bureau Amsterdam (EBA) a ehekutá, ta mustra kon importante turismo ta pa Boneiru su ekonomia, pero e ta atvertí tambe pa e riesgonan di un kresementu ku no ta kontrolabel.
EBA a presentá e rapòrt durante un seshon di desayuno pa e miembronan di BONHATA. Ku un margen grandi, turismo a resultá e motor ekonómiko di mas grandi di nos isla. E sektor ta representá mas òf ménos 50% di e produkto interno brutu, mas ku mitar di tur trabou disponibel, i 44% di entrada for di impuesto lokal. Na mes momentu e kresementu muchu rápido òf deskontrolá akí ta okashoná problema, manera e preshon ku ta oumentando riba nos naturalesa, nos infrastruktura i nos merkado di bibienda.
‘E estudio akí ta konfirmá loke nos komo BONHATA pa basta tempu kaba ta señalando’, segun Veroesjka de Windt, direktor di BONHATA. ‘Turismo ta di vital importansia pa Boneiru, pero e mester kana man den man ku protekshon di nos naturalesa, nos kultura i nos ambiente di biba. E tempu di kresementu sin ningun kompromiso a pasa. A bira tempu pa eskohonan dirigí.’
Segun e investigadónan, kresementu ekonómiko sostenibel ta posibel mediante un oumento dirigí di e kantidat di turista. Pa medio di enfoká riba turista ku un nivel mas haltu di gastamentu i reakshoná mas adekuadamente riba merkadonan manera Nort Amérika, e sektor por generá mas balor ku relativamente ménos preshon riba nos naturalesa i infrastruktura. Pa e motibu akí BONHATA ta boga pa un strategia di kresementu kualitativo, kaminda ta traha pa logra un grado di okupashon di 70% ku turista ku ta gasta mas i ku ta kuadra mas mihó ku e karakter sostenibel di Boneiru.
BONHATA ta enfatisá ku nan ta tuma preokupashonnan di nos poblashon na serio. Hopi habitante ta rekonosé importansia di turismo, pero ta preokupá ku entre otro skarsedat di bibienda, tráfiko muchu drùk i pérdida di identidat. Pa e motibu akí den e periodo binidero BONHATA ke drenta aktivamente den kòmbersashon ku nos habitantenan i otronan enbolbí pa konhuntamente edifiká un strategia di turismo sostenibel ku sosten amplio.
‘Nos ta tuma nos responsabilidat komo representante di e sektor na serio’, segun De Windt. ‘Den sinkronisashon estrecho ku gobièrnu, empresanan, habitantenan i organisashonnan sosial, nos ke duna direkshon na un futuro kaminda turismo ta sigui kontribuí na prosperidat, sin ku esaki ta bai a kosto di e kosnan ku ta hasi Boneiru úniko.’
For di awe por konsultá i download e Estudio di Impakto di Turismo kompleto riba wèpsait di BONHATA: www.bonhata.org