Departamento di Salubridat Púbiiko a lansa e djengel pegahoso ‘Biba kuné’. A traha ‘Biba kuné’ pa rekordá tur hende kon tene Boneiru salú awor ku no tin medida di corona mas. Kolaboradó Shermantha Frans di departamento di Salubridat Públiko a skirbi músika i teksto pa e djengel. JC and Friends a kanta i toka e djengel.
Despues ku a stòp ku medidanan di corona, departamento di Salubridat Públiko a kuminsá ku un kampaña pa informá komunidat kon tene Boneiru seif. Asina a traha un videoclip tokante tèst propio pa alumnonan di enseñansa sekundario. Den e video, un alumno di skol sekundario ta splika kon dos biaha pa siman e ta hasi un tèst propio promé ku e bai skol.
Pronto empleadonan di departamento di Salubridat Públiko ta bai skol pa informá alumnonan tokante biba ku corona. Departamento di Salubridat Públiko ta preparando tambe un akshon ku bista riba selebrashon di Dia di Rincon. Preparashonnan pa e akshon aki ta den ful suin.