E promé kuater studiantenan ku a kumpli ku e eksigensianan di atmishon a risibí nan Bonaire Tourism Scholarship
Na luna di ougùstùs 2022 Tourism Corporation Bonaire (TCB) a firma un akuerdo di kolaborashon ku Guardian Group Fatum (GGF) pa konhuntamente lansa un inisiativa edukativo pa komunidat boneriano ku komo título ‘The Bonaire Tourism Scholarship Program’.
E personanan ku kier a apliká durante dos luna a haña oportunidat pa registrá pa e Bonaire Tourism Scholarship Program. 10 di òktober tabata e ‘deadline’ pa entregá nan petishon. En total nos a risibí 59 registrashon. Despues di a filtra tur petishon, a sobra 19 kandidato ku a bini na remarke.
Nos a selektá e promé kuater kandidatonan ku a kumpli ku e eksigensianan di atmishon i nos a honra nan ku un Bonaire Tourism Scholarship. Tur kandidato ta studia Tourism & Hospitality na SGB, departamento di MBO. TCB ta spera di otorgá mas beka adishonal, asina ku e otro kandidatonan kumpli ku tur eksigensia di atmishon.
‘Ta un sintimentu fantástiko pa por rekonosé i selebrá nos profeshonalnan di futuro, pa medio di otorgá nan un beka pa turismo. Den e studiantenan akí mi ta rekonosé mi mes hopi aña pasá, tempu ku pa promé biaha mi a kuminsá ku mi karera na e edat hóben di 15 aña. E studiantenan akí tin un soño, pero nan ta desidido pa hasi un diferensia pa industria di turismo na Boneiru. Nos ta deseá nan lo mihor i spesialmente nos ta gradisí nos partnernan pa nan kolaborashon i sosten’, segun e direktor di TCB, Miles B M Mercera.
Djamila Braaf, Manager Marketing Dutch Caribbean di Guardian Group Fatum, a bisa: ‘E balornan núkleo di Guardian Group Fatum ta e prinsipionan mas importante di nos organisashon i nan ta representá kalidat i karakter di nos organisashon. Nos ta kere den mehorashon kontinuo i nos ta enkurashá otronan tambe pa awe ta mas mihó ku ayera. Pa e motibu akí nos ta haña importante pa kontribuí na formashon di e studiantenan akí, pasobra nos ta kere ku formashon i konosementu ta e instrumentonan mas importante pa mehorashon i éksito. Nos ta sinti nos honrá di por traha huntu ku TCB den e proyekto akí i nos ta hopi orguyoso ku nos ta forma parti di e biahe akí ku e studiantenan.’
Tokante e beka
E Bonaire Tourism Scholarship Program ta yuda ku finansiamentu di kursonan individual i profeshonal di desaroyo i kursonan akadémiko fultaim riba tur tereno di formashon pa Hospitality i Tourism Management pa estudio riba nivel di Associate (MBO), Bachelor i Master. E beka ta hasi posibel pa studiantenan i no-studiantenan ku ta presta bon pa alkansá nan metanan edukativo, logra nan ophetivonan profeshonal i realisá nan soño. Ademas e programa di beka ta permití e partisipantenan pa hasi uso di vários oportunidat pa kontinuá ku nan desaroyo profeshonal. E beka akí ta un instrumento o sea un oportunidat efektivo pa mehorá selekshon di hende lokal kualifiká i pa stimulá mantenshon i kresementu profeshonal den sektor turístiko di Boneiru.