Featured Politica

Parlamentario Arthur Dowers Minister Ursell Arends a converti su mes mas mepista cu e propio Evelyn


Dilanta camaranan di prensa diahuebs merdia,  Minister di Integridad, Ursell Arends a  confirma na pueblo cu su partido y su persona, ta mas mepista  cu e propio lider di MEP, esta Evelyn Wever Croes.

Para banda di su hefe di gobierno,  e minister di integridad aki a presta su mes pa sostene gañamento di Prome Minister caminda loke ta mas serio, ta e hecho cu Ursell ta complice awor di gañamento di pueblo, e mesun pueblo cu el a sigura cu e lo  sirbi  den gobierno.

Parlamentario Arthur Dowers a mustra cu ta realmente impresionante pa mira un minister cu supuestamente ta representa integridad den gobernacion di e pais, ta entrega su idealnan politico den un forma asina barata, pa motibo cu e stoel di Minister, su auto nobo como Minister, tin mas balor cu interes di pueblo.

“Na momento cu Ursell como Minister di Integridad bin dilanti y trata di manipula cu e interes general di su pueblo cu e tin cu sirbi, esey ta mustra cu su persona y su gobierno no tin pueblo na pecho.

Pa colmo ta mustra cu den Evelyn Wever Croes lider di MEP,  minister Arends ta mira su idolo politico, caminda e kier ta riba mesun nivel cu su hefe y ta presta su mes pa yuda  Evelyn gañsa y manipula pueblo.

Na Papiamento tin un dicho cu ta bisa “miho bo aparente bobo den bista di hende, cu habri bo boca y tur hende haya sa cu realmente bo ta un bobo,”  y ta esey Ursell a haci diahuebs den presencia di Prome Minister.

Mescos cu e lider di MEP y su integrantenan di partido for di 2017 a bin ta gritando nan lema politico di mega debe,  Ursell a haya ta bin di bin dilanti diahuebs  y papia di “debe hereda”, mustrando un mentalidad bruha, un incapacidad total pa su falta di conocemento con su pais mes semper a funciona riba nivel di gobernacion.

Pais Aruba den su historia politico, semper tabatin debe mescos cu cantidad di otro paisnan rond mundo, ya cu semper nos isla tabatin mester di ayudo financiero pa hiba un gobernacion caminda por financia proyectonan na interes di comunidad.

Semper esaki tabata e caso pero pa defende un maneho asina deplorabel cu su persona  hunto cu Evelyn a bin ta hibando for di 2021, e tin cu schuif e culpa riba otro bisando cu nan a haya un debe hereda.

Lo ta bon pa Ursell busca den historia di gobernacion di  Aruba, caminda e no mester bay mucho den pasado ya cu na 2009 ora cu gabinete Mike Eman I a tuma mando di e pais for  di un gobierno di MEP, a bin haya scolnan na werki, un fondo di pensioen cu tabata laba laba na bancarota, un economia mal pega, un servicio medico deteriora, un turismo mal pega  tanto pa loke ta den e parti di aviacion y cruceronan.

Gobierno di AVP no a tuma medida, al contrario a busca solucionnan valido pa atende cu necesidad di e pais, a traha duro restaurando cantidad di scol, salbando e fondo di pensioen, a percura pa renobacion di hospital. 

AVP a percura pa u reparatie toeslag, a duna trahadonan publico bek nan indexering cu MEP a kita for di nan y cantidad di otro proyectonan mas pero awor ta bin un Ursell Arends, cu no tin nocion di kico e tin cu haci pero ta cana tene na saya di e lider di MEP ya cu ta cerca e lider di MEP el a haya chens pa bira Minister,” Parlamentario Arthur Dowers a declara.

Related posts

Marisol Lopez Tromp cu tres conflicto politico partidario den su carera

EA News Author

Maneho financiero di Boneiro ta preocupa Cft

EA News Author

Minister di enseñanza actual a subi e presupuesto di enseñanza mas cu 10% den momento di crisis

EA News Author

Leave a Comment