Awe mainta Parlamento di Aruba lo atende e presupuesto pa e Fondo di Inversion (Investeringsfonds), un iniciativa cu Parlamento a aproba na juni ultimo.
E fondo aki ta representa un cambio structural den e maneho di finanzas publicas, segun parlamentario Muzannine Wever.
Contrario na e presupuesto regular caminda e recursonan no-usa na fin di aña ta bay perdi of mester wordo otorga di nobo, e fondonan den e Fondo di Inversion ta rol over (pasa pa e siguiente aña).
Esaki ta sigura cu proyectonan di gran escala cu hopi biaha ta keda afo di e presupuestonan regular ta ricibi e fondonan necesario y ta wordo ehecuta di principio pa fin sin interupcion.
E fondo ta traduci promesanan di campaña den realizacionnan concreto pa e bienestar di e pais, abarcando tanto infraestructura como trabounan di mantencion y digitalisacion.
Casi 59 Miyon Florin Destina pa Proyectonan Estrategico
Segun e ultimo revision, e Fondo di Inversion lo conta cu casi 59 miyon florin destina pa un variedad di proyectonan vital pa nos sociedad. Entre e proyectonan mas destaca tin:
Carateranan y Infraestructura: Casi 7 miyon florin ta wordo destina pa mantencion di caminadanan existente y construccion di caminadanan nobo rond di e isla.
Vivienda: Inversionnan den proyectonan di cas, atendiendo un di e necesidadnan mas grandi y urgente den nos comunidad.
Desaroyo pa San Nicolas: Construccion di e MFA na San Nicolas, un proyecto cu e districto aki ta wardando riba dje pa hopi aña.
Educacion y Salubridad Publica: Renovacion di scolnan, manera e scol Reina Beatrix, y trabounan di mehoracion na e berm di Sero Colorado.
Mehoracion di Servicio Publico: Reemplaso di e dump trucks di DOW pa fortalece e trabounan di limpiesa den nos barrionan.
Digitalisacion (e-Government): Continuacion di e digitalisacion di e-Government y di e sistemanan na Sociale Zaken, permitiendo cu ciudadanonan por haci nan tramitenan online di un manera mas rapido y eficiente.