Matrimonio entre homber y muher a wordo institui door di Dios ( Genesis 2:24), y dia pa dia nos ta mira cuanto dificultad matrimonio ta enfrenta , pasobra e ta un laso divino entre Dios, un homber y un muher.
Di berdad matrimonio y famia tin enemigo visibel y invisibel.
Laga nos pone e asunto di matrimonio di mesun sexo un banda, pasobra tur hende sa cu no ta esey ta locual Dios a institui.
Pasobra e matrimonio cu Dios a institui a wordo haci pa creacion por multiplica, pa mundo por a yena cu ser humano, y asina Famia bira e pilar social di comunidad, y e resultado ta cu nos tur awe ta bini for di un famia, pasobra e plan di Dios ta perfecto.
Matrimonio ta exigi hopi fieldad, y responsabilidad, hopi, amor especialmente ora bo tin yiu y mas cu tur cos bo mester corda cu Cristo Hesus ta e cabes..
Bendiciona ta e homber cu ta stima su esposa, cuida su matrimonio y su Famia.
E homber aki no solamente ta fiel na su esposa, pero tambe e ta fiel na Dios y henter su famia.
E homber aki a reconoce cu e ta un mentor no solamente pa su cas, pero pa e bario completo, pasobra tur hende ta wak con un homber ta trata su famia, pasobra na cara di su famia, bo ta mira cu cosnan ta canando na ordo. Ta dificil pa sende lus na caya y laga bo mes cas den scuridad.
E homber tin di keda humilde e no tin mester di broma, pasobra na su frutanan bo ta reconoce kico e ta haciendo.
Ta hopi cos ta existi cu por pone un matrimonio na peliger diariamente, pero cu yudansa di Dios e matrimonio lo prevalece.
Falta di comunicacion ta pone matrimonio y famia na peliger, especialmente ora nos ta trata cu nos yuinan, mama y tata mester ta di un opinion, Tata no por ta bisa no y Mama ta bisa si, mester sinta hunto y dialoga y no discuti dilanti di mucha, pasobra esey ta e causa mayor di rebeldia bao di hubentud awendia.
Mayornan mester tuma decision husto na bienestar di e yiu y henter famia.
Rabia y insulto, violencia domestico, manipulacion financiero, manipulacion sexual,infieldad ta enemigo di tur matrimonio.
Amargura y falta di pordon, ora algo sosode esposo/esposa por pordona otro y sigi padilanti, Locual Dios a uni no laga hende destrui.
Caminda no tin pordon no tin bendicion. (Mateo 6:14-15).
Droga y alcohol a caba cu hopi matrimonio y destrui hopi famia, y te ainda tin hende ta papia di legalise, te ainda tin hende cu ta pensa cu nan por caba cu alcohol.
Y esnan cu ta bende droga nan consenshi ta kima cu hero cayente, pasobra hopi di nan ta destrui nan mes hogar y nan famia.
Ora un homber ta orguyoso, e spirito di machismo ta halto den su bida, y bo tende di un homber cu ta yega for di trabao, e no por haci nada den cas, e ta subi cama drumi warda cuminda, homber cu no por laba un tayo, ni tampoco pasa un basora den cas, e ta yega cas 5pm, pero no por pone un wea na candela.
Tin biaha bo ta puntra bo mes cu ta posibel cu den e tempo aki tin hende asina?
Bendiciona ta e homber cu tin temor di Dios, cu tin Señor na prome lugar den su bida,cu ta pone su famia den oracion tur dia, y ta confia Dios, pa su hogar ta bendiciona.
Si nos tur uni pa preserva matrimonio y famia, nos por spera bendicion di Dios, nos hubentud lo ta sano, den tur locual cu nan ta haci.
I am text block. Click edit button to change this text. Lorem ipsum dolor sit amet, consectetur adipiscing elit. Ut elit tellus, luctus nec ullamcorper mattis, pulvinar dapibus leo.