Matadero Boneiru ta wak positivamente den direkshon di futuro

Aktualmente tin hopi kambio ta tumando lugá den matadero. Banda di e echo ku durante e aña tras di lomba den un proyekto konhunto ku ministerio di Agrikultura, Naturalesa i Kalidat di Kuminda a traha duru riba renobashon di matadero, e empleadonan di Departamento Veterinario Boneiru a sigui un kapasitashon di matamentu di bestia tambe.

E kapasitashon ku e empleadonan di Departamento Veterinario Boneiru a sigui tabata un kapasitashon ku SVO di Hulanda a duna. E kurso mes a tuma lugá na Kòrsou i nos empleadonan a sigui esaki huntu ku e Servisionan Veterinario di Kòrsou, Aruba i Sint Eustatius. 

Tabata un momentu spesial pa mira tantu Servisio Veterinario asina for di den region huntu, pa siña huntu i pa interkambiá eksperensia. Durante e siman di kapasitashon a trata temanan manera bienestar di animal den matadero, mata bestia higienikamente i e téknikanan mas nobo di matamentu di bestia. Tur esaki den un meskla di teoria i práktika. Ku e informashon nobo di e kapasitashon, Departamento Veterinario Boneiru den e tempu binidero por kontinuá ku matamentu di bestia den un forma ku ta seif pa nos kuminda.