Ban sòru pa diálogo i trankilidat den nos salubridat

Frakshon di MAN a tuma nota di e último desaroyonan rondo di CMC i ta di opinion ku esakinan no ta na fabor di e kalidat di kuido ku nos pueblo mester risibí.

Pa Frakshon di MAN sano huisio mester prevalesé di forma ku por yega na un solushon pa e situashon aktual. No por ta asina ku tur dia di nobo nos pais ta lanta ku un problema mas ku tin di haber ku CMC. CMC ta nos hospital nashonal. Esaki ta nifiká ku nos kada un mester aportá ku nos granito. Nos pueblo mester por risibí kuido i hasi operashon ora ta nesesario sin ningun preshon i preokupashon.  

Manera nos sa e komishon “Sanering CMC entiteiten” na òktober 2022 a anunsiá ku e parti finansiero di CMC mester keda atendé i solushoná mas pronto posibel.

Giselle Mc William di Frakshon di MAN na diferente okashon a hasi petishon pa kuminsa konsientisá nos pueblo pa kuida su salú i prevení malesa. Nos mester hasi nos maksimo esfuerso pa mitigá e kandidat di pashèntnan ku mester akudí pa kuido médiko na CMC. Segun sifrasnan e kantidat di pashent ku ta keda atmití na CMC ta oumentá anualmente ku 10%, mientras ku e sèn ku tin pa manehá CMC no ta sufisiente.

E liña di kuido (anderhalf lijnzorg) mester re-enforsá dòkternan di kas i asina evitá ku ta manda e pàshentnan pa spesialistanan. Esaki ta un di e motibunan ku tin lista di espera largu.

Gobièrnu mester kontinuá ku e plan pa laga kuido médiko ta mas serka di e pueblo ku sentronan multidisiplinario den area di Banda Bou i Banda Riba.

E tenshon ku tin entre spesialistanan, gerensia di CMC i minister Javier Silvania no ta na interes di pais. No por ta asina ku ta invita spesialistanan pa sinta na mesa i di otro banda minister Silvania ta menasá di publiká e rapòrt interno di sala di operashon.

Si, akaso e rapòrt aki tin konsekuensia mester laga esaki pa inspektor di salubridat atendé den kuadro di lei i trankilidat.

Finalisando Frakshon di MAN ke enfatisá ku kuido no ta konsistí di unikamente spesialistanan, pero tambe di e enfermero, enfermera i asistente di sala di operashon ku pa diferente motibu ta skohe pa bai biba Hulanda na gran eskala manera den añanan 90.

Frakshon di MAN ta urgí gobièrnu pa atendé e situashon aki di un manera integral i ku rèspèt pa asina por garantisá trankilidat di pueblo i tur esunan envolví.

Komunikado Frakshon di MAN