Minister Ursel Arends ta bringa y ta contra pa paga trahadonan di SABA

Minister Ursell Arends causante cu trahadonan di SABA a hiba LandAruba corte pa pago di nan salario di 3.4 miyon cu e mandatario no kier paga. No ta un secreto cu minister Ursell Arends ta un mandatario arogante y sin vision pa ningun di su carteranan cu e ta maneha. E trahadonan di SABA mester wordo paga y mester ricibi nan salario cu nan tin 21 aña ta warda..

Na momento cu e problema a surgi DRH a haci un investigacion y na unda cu a resulta cu e trahadonan di SABA mester haya nan salario, sinembargo Minister Ursell Arends no a confia den e organo di gobierno y den e profesionalnan local cu ta traha pa LandAruba, pero a bay paga un compania priva Kde Kort Registeraccountant n.v , pero a resulta cu e Raport yama “ Rapport inzake de uitvoering van specifiek overeengekomen werkzaamheden bij stichting algemene bejaardenzorg Aruba” a sali e mes un resultado cu e investigacion cu DRH, Finansas y otro departamentonan a haci, pero tambe tabatin un decision den minister raad cu a tuma luga cu e trahadonan di SABA mester wordo paga.

Asina mes e mandatario cu su arogancia no kier confronta cu e berdad y no kier para responsabel pa loke e trahadonan di SABA tin derecho riba dje y paga e trahadonan di SABA. Dos investigacion no ta basta pa e mandatario realisa y compronde cu asina e situacion ta awo. Minister Ursell Arends kier laga haci un di tres investigacion den SABA , paso segun minister Ursell Arends investigacion di DRH y financien ta robes , pero tambe Kde Kort Registeraccountant n.v tambe ta fout.

Segun informacion cu EAnews ta disponi di dje ta cu Minister Ursell Arends ta rabia y no ta contento cu e resultado di Kde Kort Registeraccountant n.v y lo bay paga y busca un otro acountingregister pa haci un di tres investigacion. Pa Minister Ursell Arends tur hende den investigacion a haci fout y e ta e persona corecto den tur e proceso aki cu segun e mandatario no mester paga e trahadonan di SABA. Esaki ta un modus operandus cu e mandatario ta rek e cakiña pa e no paga, pero e realidad ta cu e mandatario mester paga.

Mirando tur e tempo cu e situacion aki tin andando ta trata aki di tres grupo, personanan cu ta traha ainda, ex trahadonan cu a bay cu pension y hasta tin algun cu a fayece, pero nan famianan cu ta heredero tin derecho di cobra e placa. E grupo aki a bisa ta basta y a lanta un caso contra SABA , na su turno SABA sigur lo yama LandAruba “in Vrijwaring”.E caso a bay aden dia 13 Juli y dia 2 di augustus 2023 a yama SABA y e caso mes lo ta dia 19 di september 2023 unda cu mester tin e verweerschrif.

Lamentablemente e mandatario no kier lanta for di soño y realisa ni cuanto investigacion cu wordo haci e resultado no ta bay ta diferente, esaki a keda demostra caba na dos investigacion cu a wordo haci door di profesionalnan y e resultado na final ta mes un cos. Simplemente a mandatario mester paga e trahadonan, pero e no kier.

Sinembargo e intencion maligno di e mandatario pa no paga e trahadonan awo aparentemente lo a lanta un comision cu e mandatario kier pa nan canta manera cu e minister kier pa nan canta, aunke cu esaki no ta na su luga. E mandatario kier cueste loque cueste pa e comision duna di conoce cu SABA lo a ricibi e placa caba, aunke cu esaki no ta cuadra cu berdad, sabiendo cu tin dos rapport cu ta papia lo contrario, asina paharitonan den gang di SABA y bestuurskantoor ta canta y ta sorprendi den actuacion y actitud arogante di e mandatario. E comision ta consisti di mediador di gobierno A.Pontillius, Voorzitter J.Figaroa,I.Posner,I .Valdes,J.Wolter, S.Luydens y J.Lacle.

Tambe tin indicacion cu director di Hospital Jacco Vroegop cu no ta un medico tin su nanishi tambe hunto mano a mano cu Minister Ursell Arends cu e intencion maligno pa no paga e trahadonan di SABA.

Sinembargo tambe di otro banda mester por mira cu LandAruba no ta den e miho condicionnan y no tin placa, pero esaki ta causa di mal maneho di e mandatario Ursell Arends, awe Pais Aruba mester paga pa su mal maneho y mal decisionnan, pero na mes momento si ta paga basta placa pa e bay pone un di tres rapport unda cu un biaha mas lo kier haci investigacion cu ya caba tin dos rapport cu a bisa e cosnan claramente.

Esaki ta un desaroyo cu EAnews.com ta sigui di cerca y tin varios combersacionnan andando caba cu diferente di e trahadonan.