dr. Glenn Thode ta na Aruba unda cu tabata e keynote pa e aña academico di Universidad di Aruba, actualmente dr. Glenn Thode ta biba na Hulanda y ta Associate professor na Universidad di Gronningen y ta traha den un departamento di Criminal law como Criminology , Strafrechten en criminaliteit cu ta derecho rond di derecho criminal of penal y tambe Criminologia.
Den e presentacion cu a ser duna na Universidad di Aruba a duna diferente conseho tambe , ta trata aki di un investigacion cu a haci pa e islanan BES pa nan desaroyo te cu aña 2050. Haciendo e investigacion aki a descubri asina hopi y a bira mas consciente di e causanan di gastonan halto porehempel cu e ciudadanonan riba e islanan ta confronta diariamente y con por baha e gastonan y con por hisa nan entrada. Den e constitucion di Hulanda tin un articulo cu ta bisa cu mester reparti e rikesa di e comunidad na tur su ciudadanonan pa tin un bida digno.
Den un manera e gobierno tin un responsabilidad pa percura pa gastonan no subi mucho hopi y pa e ciudadano tin un entrada por lo menos cu por cumpli cu tur su necesidadnan basico. E ciudadano mester tin un cas riba su cabes, mester tin cuminda y esunnan cu tin yiu mester por duna e yiunan cuminda, mester por tin transporte pa bay trabou, por paga luz , coriente y awa.
Den e investigacion a haci un analisis hopi detaya di tur e puntonan aki riba tur e tres islanan. Banda di esaki a haci un investigacion di e desaroyo demografico , esaki kiermen con e poblacion lo bay desaroya e añanan binidero. Na momento cu a haci e investigacion pa e islanan BES loke cu a nota tambe ta cu Aruba, Corsou pero tambe St Maarten unda ta tuma nota cu decisionnan ta keda tuma y na momento cu ta mira e rason nan dicon e ciudadanonan ta tuma e decision ta basicamente cu nan rason cu nan ta tuma decision no ta cuadra cu loke cu a mira cu lo ta traha pa e Pais nan na momento cu a haci e investigacion. Esaki ta pone cu e decisionnan ta inefectivo pa e metanan y e propositonan cu ta tuma e decision. Na momento cu a tuma nota di e movecion aki a bay haci un investigacion unda cu a analisa algun punto di data di informacion di e poblacion na Aruba y asina a compara esaki cu esunnan di e islanan BES.
Na momento cu a compara esaki ta mira un indicacion fuerte cu tin indicacion cu e mes un desaroyo ta tumando luga na Aruba tambe. Mirando esaki dr. Glenn Thode a duna e conseho pa Aruba haci un investigacion mas profundo pa asina descubri kico ta e causa di gastonan halto.
Na Hulanda porehempel si puntra economistanan hopi biaha nan ta kere cu mester laga e mercado liber anto mercado liber ta baha gasto, pero lamentablemente riba nos islanan den Caribe e no ta traha asina. Aki ta caminda cu mester wak y investiga kico ta causa e gasto halto pa asina bin cu maneho y tambe tuma medidanan cu ta directamente tin efecto riba loke e ta causa e gastonan halto y asina por baha e gastonan. E parti aki ta un di e recomendacionnan cu a keda duna pa gobierno por laga haci e investigacion aki pa por baha e gastonan na Aruba.
