Festival di Spoken Word di Biblioteka Públiko “Kultura i Kreatividat”

Biblioteka Públiko ta invitá tur hende pa e promé festival di ‘spoken word’ di e aña
akí. Bin disfrutá di un anochi yen di palabra fuerte i storianan inspirativo!
Un eksperensia úniko
Dia 16 di febrüari 2025 for di 18:00 or te 21:00 or biblioteka ta organisá un evento di ‘spoken
word’ na Zòzò Ranch. E partisipantenan di e tayer ku ta dura seis dia di e poeta Nathania
Engelhardt ta presentá e obranan ku nan mes a skirbi den un ambiente íntimo. E evento ta grátis,
pero registrashon ta obligatorio. Manda un mensahe na +599 777 5362 òf registrá via e página di
Facebook di Biblioteka Públiko Boneiru.
Kultura i Kreatividat
Biblioteka Públiko Boneiru ta desaroyando su mes for di un biblioteka tradishonal pa fia buki, pa un
organisashon sosial kultural, kaminda entre otro ta dediká atenshon na arte i kultura. Den e kuadro
akí na aña 2024 a kuminsá organisá presentashon di ‘spoken word’. Esaki ta kontinuá na aña
2025. Pa medio di brasa ‘spoken word’, biblioteka ta ofresé un podio pa idioma, arte i komunidat. E
evento akí ta stimulá ekspreshon propio kreativo i ta duna nos hendenan un oprtunidat pa laga
tende nan bos. E ta konektá hende pa medio di storia i e ta engrandesé abilidat literario di e
partisipantenan. Di e manera akí biblioteka ta kontribuí na un kultura inklusivo i diverso.
Artistanan invitá inspirativo
Babs Gons
Babs Gons ta un eskritor, artista i presentadó. E ta konosí pa su poesia ku ta sosialmente enbolbí.
Komo e anterior lider artístiko di ‘Poetry Circle’ i ‘Dichter des Vaderlands’ (2023-2025) e tin un
influensia grandi riba arte ku nan ta presentá riba esenario. Su obra ta konsistí di poesia, kolumna i
buki pa mucha i su aktuashonnan ta konmové i inspirá hende rònt mundu.
Nathania Engelhardt
Nathania Engelhardt ta un ‘debater’, coach i poeta eksperensiá i alabes eskritor di Mond vol
(Wintertuin Kòrsou). El a duna guia na e partisipantenan na momentu di skirbi i presentá nan
obranan. Ku su sentido skèrpi pa idioma i konosementu di literatura, el a yuda nan pa konta nan
storianan yen di konfiansa.