Minister Geoffrey Wever a reuni cu Sr. Ramon Negron, Consul General di Merca pa Aruba. E reunion tabata productivo, tocando diferente punto economico di importancia pa ambos Aruba y Merca.
E reunion entre Minister Geoffrey Wever y e Consul General, Sr. Ramon Negron, ta pone enfasis riba e importancia di continuacion di cooperacion riba tereno economico y di seguridad.
E relacion entre Aruba y Merca ta fuerte. Aruba ta un di e destinacionnan turistico preferi di Mericanonan, y ta cas di diferente inversionnan multi-miyonario Mericano, entre otro den turismo y energia, cu a traves di e añanan a/ta contribui enormemente pa e desaroyo economico di Aruba. Nos relacion cerca cu Merca ta wordo ilustra tambe door di e U.S. Customs and Border Protection (CBP) Preclearance cu tin na aeropuerto di Aruba, un di e diesseis (16) na mundo, y ta importante pa nos preserva e cooperacion aki, mirando CBP ta yuda aporta na seguridad di ambos Merca y di Aruba.
Tin necesidad pa mantene un dialogo habri riba cooperacion economico. No ta secreto cu tarriffs implementa pa Merca, y cualkier accion retaliatorio di otro paisnan (Canada, Mexico, China, EU) lo tin efecto riba costo. E aumento di costo aki ta wordo pasa pa e productonan den forma di aumento di prijs. Mayoria di productonan importa na Aruba ta bin via di Merca, pues nos lo ta indirectamente afecta pa e desaroyonan aki.
Durante e reunion minister Wever a trece esaki dilanti como un preocupacion, di cual lo comparti informacion necesario tocante e impacto cu e desaroyonan aki tin riba Aruba. Ministerio di Asunto Economico a bin ta monitor e situacion aki di cerca, y mirando cu continuamente tin desaroyo e departamentonan concerni lo sigui documenta y ‘update’ e efectonan.
Minister Geoffrey Wever a expresa su agradecimento na Sr. Ramon Negron pa su bishita, y pa e bon relacion y cooperacion continuo entre Merca y Aruba.
