Den cuadro di Centro di Bario Noord su participacion pa proyecto di “Let’s ACT” den alineacion cu Centro di Bario Noord su vision cu ta pa stimula e desaroyo, crecemento spiritual, social, cultural y deportivo pa e pueblo di noord, Centro di Bario Noord ta lanzando lesnan pa e comunidad di Noord den e siguiente disciplinanan cu ta Teatro, Canto, Cuarta y Baile Folklore.
“E meta di e projecto aki ta pa mantene e identidad di nos pais y su cultura pa nos generacion actual y generacionnan binidero. Nos meta general di Centro di Bario Noord ta pa trece e pueblo di Noord hunto, den cuadro di esaki nos ta organisa actividad, proyecto y charla riba diferente topico y pa diferente edad, pa asina cumpli cu nos objetivo,” lider di programa, Sra. Ligia Croes ta conta.
E lesnan lo cuminsa na luna di april y lo continua te cu luna di november, clausurando cu un tremendo presentacion unda participantenan lo presenta nan obra den luna di december.
Detaye pa e lesnan ta lo siguiente:
Canto: diamars 1 di april 2025 di 5:00pm – 6:30pm, pa hobennan di 12 – 18 aña
Teatro: diaranson 2 di april 2025 di 5:00pm – 6:30pm, pa hobennan di 12 – 18 aña
Baile Folklore: dialuna 7 di april 2025 di 5:30pm – 6:30pm, pa muchanan di 7 – 12 aña
Cuarta: dialuna 7 di april 2025 di 5:00pm – 6:30pm, pa muchanan di 7 – 12 aña
“Aparte cu e diciplinanan aki ta trece union den nos comunidad, baile y arte tin hopi beneficio den e desaroyo di nos muchanan/hobennan. Envolve muchanan den arte, baile, musica, teatro ta mehora desaroyo, fortalece auto-estima, alimenta creatividad y mehora habilidadnan social. Nan ta custumbra traha den ekipo, desaroya habilidad di liderazgo, como tambe diciplina.”
“Nos di Centro di Bario Noord, ta encurasha hobennan pa bin y participa pa asina desaroya nan talento y creatividad. Registracion mester tuma luga sea via whatsapp 5682935 of tambe por via email: ligiaplcbn@gmail.com.” Ultimo dia pa registra ta dia diasabra dia 30 di maart, 2025.
