Ta for di chiki, mayornan tin cu tene bon cuenta pa arogancia nos gara curason di nan yuinan.
Hopi biaha bo ta tende hende ta bisa, cu mi yiu tin un karakter fuerte, e no ta tolera, e no ta tuma nada na man di ningun hende, y hopi ta kere cu esey ta bon, pero sin realisa cu ta arogancia ta domina.
Un hende arogante semper kier tin rason, su bos mester ta mas halto cu tur hende, e no ta respeta, locual e bisa ta asina ta, e no tin respet pa palabra di Dios.
Su orguyo ta sali padilanti cada biaha, pasobra orguyo y arogancia ta cana hunto y Dios ta rechasa tur locual ta orguyo, pasobra orguyo tin rais diabolico.
Un hende arogante ta cay facilmente den inmoralidad, pasobra e ta kere cu tur cos por, y ta wak riba otro hende , bisando cu dicon mester wak e so, y compara cu otro hende tambe ta haci mesun cos , y ta bisa cu si nan por e tambe.
Tin cuestion di prestigio, un cuestion di competencia, aunke ta den cosnan malo toch, e ta pretende cu e ta bon, por ehempel, hende arogante no ta worry pa cana cu arma, pasobra e ta bisa cu si otronan por cana cune, e tambe por cana cune, esey ta un ehempel hopi conoci.
Ora purba coregi e persona e ta bisa bo, bo cuanto hende ta cana cu arma dicon ta riba mi so bo ta wak, dicon ta mi so nan tin cu wak.
Mescos cu arogancia y perversidad a drenta den e moda y bistimento, pasobra si bo kier coregi un persona arogante cu su bisti no ta decente, e ta bisa bo ta moda.
Hopi hende arogante no ta tuma coreccion, nan ta usa un versiculo biblico bisando: esun cu ta sin pica tira e prome piedra, esey ta un defensa arogante pa nan continua den nan bagamunderia.
Of pakico bo ta wak e splinter den mi wowo y bo no ta wak e balki den di bo, esey ta un contesta arogante, pa bisa un hende keda keto, no bisami nada, pasobra bo no ta mihor cumi, pero tur esey ta bini ora un persona ta arogante y ta resisti coreccion.
Orguyo ta bin prome cu destruccion ,y un spirito arogante prome cu caida.( Proverbionan 16:18).
Tur scritura ta inspira pa Dios,y ta util pa sinansa,pa reprendemento,pa coreccion,pa educa den husticia, pa e hende di Dios, por ta perfecto, ekipa pa tur bon obra.( 2 Timoteo 3:16-17).
E a bisa; Loke ta sali for di hende, esey ta locual ta contamina hende. Pasobra for di paden, for di curason di hende ta,
sali mal pensamento,
fornicacion,ladronisia,matamento, adulterio,echonan di cudishi, y maldad,
tambe enganjo,sensualidad,envidia,calumnia,orguyo y bobedad,
Tur e maldad nan aki ta sali for di paden y ta contamina hende.( Marco 7;20-23).
Hende arogante hopi biaha ta confia den rikesa, y pesey hopi biaha nan ta discrimina, y abusa di otro hende, pasobra nan tin placa y ta kere den poder di placa, y ta lubida cu ta Dios tin e ultimo palabra den bida di tur hende, pasobra nan no ta realisa cu poder di placa ta limita, ma poder di Dios ta eterno.
Un mucha lanta den arogancia, ta cuminsa sera porta den su bida, for di su infancia, ya cu arogancia y falta respet ta un combinacion cu diabel a traha pa mantene hende den scuridad, y nos tur sa e consecuencia ora un palo mester crece dobla, sin ningun clase di sosten.
