Frakshon di Movementu di Pueblo Boneriano (MPB) ta ekspresá su desepshon profundo i indignashon tokante e manera kon e mayoria den konseho insular a vota kontra e moshon presentá pa e frakshon durante e reunion públiko di tuma desishon públiko dia 27 di mei 2025. E moshon tabata intentá pa duna un empuhe real na e sektor di konstrukshon ku sin duda ta sufriendo gravemente.
Segun MPB, e desishon aki ta irresponsabel i no ta pone e interes di nos pueblo i nos empresarionan lokal na promé lugá. “Ta insensibel ku den un momentu kaminda hopi negoshinan ta sera porta òf ta na punto di hasi esaki, ku hendenan ta pèrdè trabou i konfiansa i e invershon nesesario ta stagná, e koalishon ta skohe pa no hasi nada,” asina e lider di frakshon di MPB a sr. Hennyson Thielman a bisa.
E moshon tabata inkluí entre otro kos:
•
Un petishon formal pa promé di yüli 2025, e kolegio ehekutivo presentá un plan konkreto pa mehorá otorgashon di pèrmitnan di konstrukshon;
•
Formashon inmediato di un ‘Mesa di Diálogo di Konstrukshon’ ku partisipashon struktural di kontratistanan lokal, transportadó-, sindikato- i stakeholdernan relevante;
•
Asignashon di fondo den e presupuesto 2025 pa stimulá proyektonan públiko di konstrukshon, kas sosial i obranan di infrastruktura;
•
Aselerashon di kasnan planifiká pa konstrukshon ku Fundashon Cas Boneriano, preferiblemente ku kontratistanan lokal.
Koalisahon a rechasá tur esaki sin ofresé un solushon alternativo. “E rechaso aki ta mustra falta di boluntat polítiko i un deskonosimentu kompletu di e urgensia ku nos isla ta enfrentá,” segun Thielman. “Koalishon ta laga e sektor stek numa i ta pone e stabilidat i e parti sosial di Boneiru den peliger.
Ainda MPB ta hasi un yamada na kolegio ehekutivo pa hasi kaso di e yamada di e sektor i di e pueblo. “Ta tempu pa skucha e gritu di yudansa di e kompanianan di konstrukshon, transportadónan, suministradónan i empleadonan. Boneiru meresé un gobernashon desisivo – no terkedat polítiko,” Thielman ta konkluí.