Konseho Sosial-Ekonómiko (SER) a emití awe un konseho formal pa ministro demishonario di Finansas, sr. Javier Silvania, tokante un proyekto di lei ku ta proponé un reforma integral di e sistema aktual di tarifanan públiko, ku ta inkluí leges, retribushon i derechonan di prekario. E reforma ta enfoká riba aktualisá tarifanan ku no a kambia signifikativamente for di aña 1992, adaptando nan segun desaroyo di inflashon.
E petishon pa konseho a yega na SER dia 14 di aprel último, despues di un desishon di e Konseho di Ministernan dia 9 di aprel. Sinembargo, e preparashon pa e proyekto di lei ya a inisiá for di yüli 2024, ku inklushon di rekomendashonnan di Direktor di e direktorado di lesgilashon i asuntunan hurídiko (WJZ) di Gobièrtnu.
E konseho di SER ta basá riba un analisís multidisiplinario, ku ta evaluá e proyekto for di un punto di bista legal, ekonómiko i sosial. Legalmente, e enfoke ta riba transparensia, seguridat legal i klaridat tokante delegashon di kompetensianan regulatorio. Ekonómikamente, e ivestigashon ta analisá si e tarifanan proponé ta kubri e gastunan real, su impakto riba presupuesto nashonal i e efisiensia di e proseduranan di kobransa. Sosialmente, SER ta evaluá e posibel efektonan di e reforma riba komunidat i negoshinan lokal, ku atenshon spesial pa gruponan vulnerabel i empresa chikí.